NgoMvulo eleZimbabwe linanze iminyaka engamatshumi amathathu lasithupha lithole uzibuse kodwa inengi labantu ikakhulu esigabeni seMandebeleni bathi ukunanza leli langa kuyize ngoba ibandla leZANU-PF liyazehlulekela njalo abalwa impi balwela ize ngoba uHulumende obusayo uselocuku ukwedlula amabhunu.
Abalwa impi yenkululeko bekuZIPRA
Umbalisi odumileyo, uMnunzana Benny Moyo ubike ukuba ngomnyaka kazibuse wakuqala wayefundela ukuba ngumbalisi eHillside Teachers College elokujabula okukhulu kodwa lokhu sekwaphela ngoba abakubona lamuhla akukhombisi ukuba iZimbabwe yathatha uzibuse.
Ucele ababusi ukuba bazinuke amakhwapha bazibuze ukuba impilo ephilwa ngabantu iyakhombisa ukuba bayazibusa na?
Uwalwa impi engaphansi kwebandla leZAPU, uMhlonitshwa uMoses Mzila-Ndlovu yena ubike ukuba okwenzakala eZimbabwe akukhombisi ukuba walwa impi ukub abantu bakhululeke.
Omunye wabalwa impi yenkululeko ekuZipra uMnu. Moses-Mzila-Ndlovu
Ubike ukuba ilanga likazibuse ngendlela abantu beZimbabwe abadubeka ngayo lilanga lokuthakazelela ukubunjwa kwebandla leZANU ngo 1963 ngoMabasa hatshi ukuba abantu bayazibusa.
UMongameli webandla leZAPU, uDokotela Dabengwa yena ubike ukuba iLizwe liphakathi kobunzima ngoba abakulwelayo abakutholanga njalo uHulumende kukhanya kanakile njalo labo abalezikhundla bagqize qhakala abanakile. UChaze ukuba abantu kumele bahlangane bakhe isizwe seZimbabwe.
Omqondisi wenhlanganiso yabalweli beNkululeko yeZIPRA, uMnunzana Ben Ncube ubike ukuba kusizani ukuthakazelela uzibuse khona kulabalweli benkululeko abasuthayo abanye belamba.
UNcube uthe banengi abalwa bengaphansi kweZIPRA abalokhe bengangatholi usizo kuhulumende okuyinto elihlazo.
Omunye waMakhosikazi alwa impi, uNkosikazi Belinda Ndebele uchaze ukuba ulusizi ngelizwe leZimbabwe ngoba kunengi okungenziwa kahle okufana lokungahloniphi imbali yabomama abalwa impi.
Unkosazana Belinda Ndebele omunye wabesifazana abalwa impi yenkululeko
UMnunzana Abel Mahlangu odume ngokulwela amalungelo ezisebenzi yena uchaze ukuba ngomnyaka wakuqala kazibuse wayesemsebenzini kodwa ngokuya kweminyaka isisindo sikazibuse siyasiphela usekhangelele ukuba mhlawumbe abazukulu bakhe bengaphila impilo engcono kulale abayiphilayo ngoba akusakhanyi ukuba iZimbabwe yathatha uzibuse. Ethi umbuso weZANU-PF usumubi ukudlula owabamhlophe.
Induna yeMatobo eZansi yeMandebeleni, uDavid Malaba ubikele uStudio 7 ukuba kusizani ukuthakazelela uzibuse abantu bakhe bebhekane lendlala enkulu kangaka.
Uchaze ukuba uzibuse engathakazelelwa kodwa indawo yakhe ibhekane lendlala njalo uhlelo lwesiphala seNkosi luleminyaka emine lungaphumi lalutho ngenxa yendlala ngakho kalakho akulungiselele abantu bakhe.
Osakhulayo ohlala edolobheni lakoBulawayo, uNompilo Siwela yena ubike ukuba ngempilo abayiphilayo njengabasakhulayo akucaci ukuba ilizwe leZimbabwe lathatha uzibuse.
uSiwela ubike ukuba impilo abayiphilayo ayibajabulisi njalo ukuthi kulabantu abalwa impi ukuba kubelozibuse akukhanyi ngoba kubuvilibana kwabasakhulayo.
Elinye njalo ikhosikazi elalwa impi yenkululeko uThoriso Phiri-Moyo ubike ukuba ngempela balwa impi ukuba kubelozibuse wabansundu kodwa kunzima ngoba abasakhulayo abazi Lutho ngakho njalo uHulumende obusayo sewathatha abalweli benkululeko kancane, bayadubeka abananzwa.
Abadala bathi lidume ledlula, ilanga likazibuse eZimbabwe selifana lamalanga onke ambalwa angathakazelelwa nguzulu ngoba ethi uHulumende obusayo ubaphethe ngocuku nanko usebusa kubi ukudlula umbuso wamabhunu.
Your browser doesn’t support HTML5
Udaba lweIndependence siluphiwa nguNompumelelo Moyo