Uhulumende uthi abantu abalambayo emadolobheni abafika izigidi phose ezimbili – 1.7 million bazanikwa imali yokudla kunsukwana ezilandelayo phansi kohlelo lweUrban Cash Transfers oluphethwe luhlangothi olubona ngenswelo zikazulu olweSocial Welfare.
Lokhu kwethulwe ngoLwesibili nguMnu. July Moyo, umphathintambo wohlangothi lolu kusanda kwenziwa umhlangano wamalunga edale leCabinet eHarare. UMoyo uthe sebeqalisile ukufaka imali kubomakhalekhukhwini balabo abazanikwa imali le bebambisana leNetOne. Kavezanga ukuba bakhethe njani abantu laba njalo umuntu munye ngamunye olambayo uzanikwa malini.
Lokhu kugcizelelwe nguMnu. Jenfan Muswere, umphathintambo obona ngokwethulwa kwemibiko, othe uhulumende ulokudla okokunika abalambayo emaphandleni lemadolobheni abafika phose izigidi ezilitshumi – 9.2 million. Uthe kusiyafika ekupheleni kwenyanga edluleyo izinduna zonke zanikwa ukudla okuyisilinganiso sama thami amahlanu – 5 metric tonnes ezigabeni zabo.
Phezu kwalokho, phansi kwehlandla lesibili sokunika uzulu ukudla uMuswere uthi uhulumende usenike abalambayo isilinganiso samathami afika phose inkulungwane eziyisikhombisa – 69,000 metric tonnes.
Umphathintambo wohlangothi olubona ngokukhitshwa kwemibiko uMnu. Jenfan Muswere uthe uhulumende usezaqala ukupha abantu abalambayo imali yokuthenga ukudla emadolobheni esithi lokhu kuzakwenziwa kungelani lamabandla ezombusazwe.
‘’Sesizaqala ukunikeza uzulu wemadolobheni imali yokuthenga ukudla. Lokhu sizakwenza sikhangela abantu abaswelayo hatshi okunye.”
Abantu abalambayo abakhulume lomsakazo weStudio 7 ngodaba lokudla okuholiswa nguhulumende bathe kuyabongeka okwenziwa nguhulumende kube labanye abathi kabakutholi ukudla lokhu. UMnu. Melusi Moyo oweEpworth uthakazelela uhlelo lokudla oluqhutshwa nguhulumende.
‘’Indlala isibhahile lapho esihlala khona ngenxa yesimo somnotho ukuba asenelisi ukuthola imali enelayo. Siyabonga uhulumende ngalokhu.”
UMnu. Robert Sinyoro uthi umangoye selala eziko ngakho-ke bafisa ukuncedwa nguhulumende.
‘’Uhlelo lolu sithabela ukuba luzancedisa kakhulu thina labantwana bethu ngoba indlala esilayo iyesabeka. Sesidla kanye ngelanga kungakho uhulumende engasipha imali yokudla singazizakala’’
Kodwa uMnu. Darlington Matakura ohlala eMasvingo uthi kabakakutholi ukudla okuholiswa nguhulumende.
Ingcitshi kwezomnotho okunhlanganiso yeEconomic Forum of Zimbabwe, uMnu Mlungisi Sibindi, uthi kumele abantu bengabandlululwa ngamabandla abawasekelayo ngesikhathi benikwa ukudla kukahulumende.
“Kulungile kakhulu ukuba banikeze abantu ukudla kodwa sesabela ukuba bengakwenza lokhu besebenzisa amabandla ezombusazwe bengacina sebebulala abantu abnengi ngendlala ikakhulu emadolobheni.”
EleZimbabwe lidinga amabhiliyoni edlula amathathu amadola eMelika – 3.3 billion eyokuthengela uzulu ukudla lonyaka ngesikhathi sesomiso esesabekayo. Kusenjalo, uhulumende uthi kukhangelelwe ukuthi lonyaka izulu lizakuna ngcono kulanyakenye ngakho-ke abalimi kumele belungiselele ukulima.
SEE ALSO:
Udaba Esilwethulelwe NguMlondolozi Ndlovu