Uhulumende weZimbabwe uthi uzabulala ezinye indlovu kunikwe imihwabha yazo abantu abalambayo emaphandleni ababhekane lesomiso esikhulu lonyaka esidalwe yisikhudumezi somkhathi ese-El Nino.
Umphathintambo obona ngezokulondolozwa kwezomkhathi lezenyamazana zendle, uNkosikazi Sithembiso Nyoni, uthi uhulumende uthethe isinqumo lesi ngenxa yendlala ehlasele abantu okwesabekayo lonyaka. UNkosikazi Nyoni, uthi omama kuzigaba ezehlukeneyo bazaqhatshwa ukubenga imihwabha yendlovu, qede iyabelwe izabelo zonke phansi kohlelo lukamongameli olwePresidential Feeding Scheme.
“Sengibhalele uDG we parks ngalokhu, ngisalindele impendulo, nguye ozatsho ukuba lokhu sizakwenza njani, njalo nini.”
Uhulumende uthi okunye okwenze ukuba baqhube uhlelo lolu yikuthi indlovu zithwalise nzima abantu ezigabeni ezitshiyeneyo. Lokhu kusekelwa nguNkosikazi Elizabeth Thebe ohlala duzane leFuller Forest.
“Azibulawe ngoba ziyasibulala laloba bengasoze basiphe ukudla, kazibulawe ngoba sezibulele abantu abanengi lemali yakhona kabazidlele bodwa ngoba siyazi inhloso yakhona ukuthi bengabamba imali sebefaka ezikhwameni bona abakurubakuru bakhona.”
Sixoxe njalo loMnumzana Eugene Ndlovu, ukhansila kaWard 17 eMabale.
“Ngumbono omuhle kakhulu lowo. Indlovu sezizinengi kakhulu kulabantu, njalo ziyabulala, zilimaza abantu. Thina sithi i- culling kayenziwe abantu bedle inyama njengoba kuyindlala kunje, lezathi ithengiswe imali iphenduke izokwenza i-ward development.”
UMnumzana Daniel Sithole, ohola inhlanganiso yezemvelo eyeGreen Shango Environmental Trust, uthi lulungile kakhulu uhlelo lokubulala indlovu.
“Njengomuntu onguchwepheshe ngokuguquka komkhathi, ngibona angathi yisinqumo esinzulu, esivumelana laso thina siyinhlanganiso. Siyayinanzela imigomonqobo efana le CITES ebona ngokunanzelelwa kwemvelo le, okuyi kuthi ziphathathwa njani, kodwa okubalulekileyo yikuba lokhu akumelanga kuze ngaphezu kwamalungelo abantu.”
Ukhansila kaWard 3 eKachechethe, uMnumzana Given Moyo, uthi umbono mibili ngalesisinqumo.
“Ngiyabonga ukuba isikhalo sesizwakele, kodwa ngiyazi ukuthi inyama yakhona sizadala futhi olunye uhlukuluzo ebantwini abazavela kwezinye indawo bedinga inyama bona bengazange bahlukuluzwe.”
UNkosikazi Nyoni uthi indlovu lezi sezizinengi kakhulu nxa kuqathaniswa lobubanzi bamadlelo azo, okuyiso isisusa sokulwisana phakathi kwabantu lenyamazana zendle. Siphinde saxoxa ngodaba lolu loMnumzana Farai Maguwu, ohola inhlanganiso ezimeleyo ebona ngezokulondolozwa kwezemvelo eyeCentre for Natural Resources Governance, othi bona kabavumelani lalokhu. Uthi sibi sezombukiso i-tourism ingaphazamiseka kakhulu kubuye njalo kwengeze ukuzingela indlovu okungekho emthethweni.
“Lapha nje kungabe bevika ngomunwe esizathweni sabo sokubulala indlovu lezi. Yisinqumo esiyingozi esingabulala le tourism eZimbabwe, njalo lokhu kisazophikiswa la phambi komthetho ngoba indlovu zivikelwe ngabamalungelo e-International Conventions, awuvuki nje, uthi sengibulala.”
Ezinye izakhamizi zithi imihwabha yendlovu lempondo kumele kuthengiswe kwamanye amazwe imali etholakeleyo isetshenziswe ukuthuthukisa izigaba zabo. Iziqondiso zesivumelwano samazwe omhlaba wonke jikelele ezeConvention on International Trade in Endangered Species of Wild Fauna and Flora, kazivumelani lokuthengiswa mahlayana kwempondo zendlovu.
Kusanda kwethulwa umbiko edale lephalamende eZimbabwe othi kulendlovu ezifika inkulungwane ezilikhulu – 100,000 elizweni. Uhulumende uthi usalihlolisisa inani leli ukwenzela ukuba kubulawe indlovu ngedlela ehlelekileyo.