Ingcwethi ezibona ngokuqhutshwa komnotho eZimbabwe zithi ilizwe lalahlekelwa yimali edlula amabhiliyoni amathathu amadollar eMelika - US$3 .1 billion kusukela ngomnyaka ka2020 kusiyafika umnyaka ka2023 ngenxa yentengo yempahla engaqedakaliyo kanye lokuntshintsha imali yakwamanye amazwe emigwaqweni.
Lokhu kwethulwe eVictoria Fallls emhlanganweni weZimbabwe Economic Development Conference nguMnumzana Currin Pindiriri ofundisa ekolitshini eye-University of Zimbabwe, owenza uphenyo labanye bakhe olwaveza ukuba impahla enengi ithengiswa ngentengo etshiyeneyo kucine kudala ukungethembeki kulabo abathengisayo labathengayo.
UPindiriri uthi imali esetshenziswa ukuthenga impahla le kayilamithelo eqondileyo okumele ingene esikhwameni semali yeZimbabwe. Uthe lokhu lokutshintsha imali emigwaqweni kwenza ukuba umnotho weZimbabwe ugugudeke kakhulu.
“Salahlekelwa yimali engange 3.1 billion kumnyaka le emithathu, kodwa lelinani liphansi kokuyikho okwrnzakalayo. Okubalulekileyo yikuba senelise ukuthi silungise indaba ye exchange rste le ngoba yikho lapho imali eziphelela khona, sibuye njalo sibelemthetho eqinileyo ukuba imali zingalahleki mahlayana nje.” Kutsho uPindiriri.
Zimbabwe Economic Development Conference 2024
Ohlaziya ezomnotho ekunhlanganiso yeConfederations of Zimbabwe Industries, uMnumzana Jimmy Psioos laye uthi kufuze imithetho iqiniswe ukuze imali ingalahleki mahlayana.
“Okukuqala, kufuze imali yelizwe isetshenziswe ngndlela ezinxileyo. Kasilungiseni indaba zokutshintshwa kwemali mahlayana.Imali le elahlekileyo ingasakhisa ilizwe elihle kakhulu, ngakho kasihluzeni ukuqhutshwa kwezemali.”
Sixoxe ngodaba lolu loMnumzana Michael Ndiweni, umqondisi weBulawayo Vendors and Traders Association.
“Silabantu abanengi ababhadaliswayo imali nge extortion ikakhulu koBulawayo kuma public spaces okurentela. Kulabanye njalo abatshintsha imali okwenza ilizwe liswele imali. Lokuu kufuze kulungiswe.”
Kodwa uMnumzana Rejoice Ngwenya owenhlanganiso yeCommon Market for Liberal Solutions uthi imali itshontshwa ngabanye abantu hatshi laba abayintshintshayo emigwaqweni.
“Angivumi ukuthi imali leniyalahleka. Imali iyabhoda phakathi kwabantu, umahluko yikuthi I informal sector kayibhenki imali. Imali ezilahlekayo ngezisiswa lapha zisiwa phandle kwelizwe ngokungekho emthethweni okuyikho okwenziwa ngama politicians bebalekisa izimali phandle kwelizwe.”
Evula umhlangano lo izolo, uMongameli Emmerson Mnangagwa ukhale ngokukhudula komkhathi okudala ukuhlupheka eZimbabwe.
“Kuyadanisa ukuba intuthu se carbon emissions ziphazamisa amazwe afana lawethu eZimbabwe. Abantu sebesedubeni ngendaba zomkhathi lo bona kungasibo abaluqalayo. Lokhu sekusenza ilizwe lethu lehluleke ukukhula, kwezokulima siphazamisekile, kanye nje lenhlakahle yabantu.”
UMnangagwa ukhuthaze abantu abatsha ukuba baphume lenhlelo zokulwisana lokuguquka komkhathi. Umhlangano lo oqhutshwa phansi kwendikimba ethi: Building Resilience and Driving Economic Transformation Under Climate Change,njalo ukugqitshwe namuhla.