Uhulumende uthi uzacela iMelika ukuthi ibuyisele isizalwane sayo eZimbabwe ukuze siyethonisiswa ngecala lokubulala isilwane ebesidume ngelokuthi Cecil.
UMnu James Palmer Palmer wetheswa umlandu wokudubula isilwane lesi ngaphandle komthetho kumaviki asanda kwedlula eze ethekelele eHwange.
Umphathintambo wezemvelo uNkosikazi Muchinguri utshele intathelizindaba ngoLwesihlanu ukuthi okwenziwa nguMnu Palmer yikuganga okukhulu njalo bafuna azebhekana lecala lakhe.
Inkulungwane zabantu emhlabeni jekelele zithukuthele ngodaba lolu. Okucunula inengi yikuthi izilwane zilakho ukutshabalala emhlabeni jikelele ngoba inani lazo liqhubeka lisehla.
Ngalokho abakhankasela ukulondolozwa kwezemvelo bathi akumelanga zizingelwe.
Inani labantu asebesayine ugwalo ekhasini lesigodlo sikaMongameli weMelika olucela uhulumende walelilizwe ukuthi abuyisele uPalmer eZimbabwe beselifike kunkulungwane ezingamakhulu phose amabili.
Ugatsha olubona ngezemvelo eMelika luthi luphakathi kokudinga uMnu Palmer, yena obikwa esebalekile endlini yakhe eMinessota, ukuze lukhulumisane laye ngaloludaba.
IMelika leZimbabwe zivumelwano sokuthi isizalwane selinye ilizwe singephula umthetho sikwelinye, uhulumende walelolizwe kuyabe kumele asibuyisele siyethonisiswa.
Lanxa inengi lithukuthele, ezinye izakhamizi zeHwange zithi azilandaba lokubulawa kwesilwane lesi ngoba izilwane zihlezi zisidla abantu kungabi ndaba zalutho.
Omunye wezakhamizi lezi nguMnu uMnu Stanley Torima.
Your browser doesn’t support HTML5
Ingxoxo loMnu Stanley Torima