EleZimbabwe Lifisa Ukuba Lilunga leUnited Nations Security Council

EleZimbabwe lithi lifisa ukusekelwa ngamanye amazwe ukuze lingene kuhlangothi lwenhlanganiso yomazwe omhlaba wonke eyeUnited Nations Security Council. Iphephandaba leHerald libika ukuba lokhu kwethulwe nguMnu. George Charamba kwele Uganda okulomhlangano oweNon-Aligned Movement.

UCharamba uthi eleZimbabwe kumele lingene kuhlangothi lolu oluqakethekisa ukuvikela amazwe ahlaselwa ngamanye mahlayana njalo lokulondoloza ukusetshenziswa kwezikhali emhlabeni wonke jikelele.

Inkulumo kaCharamba ichothozwa ngabazimeleyo abathi eleZimbabwe akumelanga lingene kuhlangothi lolu ngoba lephula ilungelo loluntu. Kodwa abakubandla elibusayo abagoqela uMnu. Joseph Tshuma owakewamela iPelandaba/Mpopoma edale lephalamende uyekusekela okukhulunywa nguCharamba.

SEE ALSO:

Ingxoxo Esiyenze loMnu. Joseph Tshuma

Abaphikisayo bathi akumelenga uhulumende kaMongameli Emmerson Mnangagwa angene kuhlangothi lweUnited Nations Security Council. UNkosazana Nonhlanhla Mlotshwa omele isabelo seMatabeleland edale leSenate utshele iStudio 7 ukuba kuqakathekile ukuba eleZimbabwe lidlelane lamanye amazwe kodwa kusakude phambili ngoba yephula ilungelo likazulu.

SEE ALSO:

Ingxoxo Esiyenze loNkosazana Nonhlanhla Mlotshwa

Siphinde saxoxa ngodaba lolu loMnu. Rejoice Ngwenya, ingcwethi kwezombusazwe okunhlanganiso yeCommon Market for Liberal Solutions othi kuyamangalisa okukhulunywa nguCharamba.

SEE ALSO:

Ingxoxo Esiyenze loMnu. Rejoice Ngwenya

I-Non-Aligned Movement igqugquzela ukuzimele kwamazwe hatshi ukuba phansi kwamanye.