EleSouth Korea ngoLwesithathu liphe i-Zimbabwe imali engena kusigidi samadola eMelika, US$1 million, ezasetshenziswa yinhlanganiso yeWorld Food Program (WFP) ukuthengela abalambayo ukudla.
Umqondisi weWFP eZimbabwe uMnu Billy Mwiingi lomphathintambo kahulumnde obona ngenhlelo zokuncedisa abaswelayo uMnu July Moyo bamukele limali ngenjabulo besithi izadala umahluko omkhulu.
I-WFP ithi ukudla okuzathengwa yimali le kuzaphiwa abantu abazinkulungwane ezedlula kancane amakhulu amabili, 22,000.
Usizo lweSouth Korea lolu luza ngesikhathi uhulumende esithi kuliviki uzasungula uhlelo lokwabela abahlaselwe yindlala emadolobheni imali.
I-WFP ithi abantu abadinga ukuphathiswa ngokudla emadolobheni bayizigidi phose ezimbili, 1.7 million, kuthi emaphandleni khona bayizigidi phose eziyisithupha, 5.9 million.
Uhulumende yena uthi elizweni lonke jikelele kulabantu bayizigidi eziyisitshiyagalolunye, 9 million, bazadinga usizo lokudla kusiyafika uMbimbitho ngomnyaka ozayo.
Inengi likhala ngokuthi okwenza umthelela wendlala udlondlobale yikukhwela kwentengo yempahla ezitolo.
Umkhokheli wenhlanganiso esebenza lozulu wemaphandleni eyeRural Communities Empowerment Trust uMnu Vumani Ndlovu utshele iStudio 7 ukuthi isimo sesisibi kakhulu emakhaya.
Your browser doesn’t support HTML5
Ingxoxo loMnu Vumasni Ndlovu
Ingcwethi ecubungula ezenotho uMnu Effie Dlela Ncube laye utshele lumsakazi ukuthi ukukhwela mahlayana kwentengo yezinto sokudale ubunzima obumangalisayo ebantwini.