Ugatsha lwendaba zasekhaya kweleSouth Africa luthi seluqale ukusebenzisa ubucwephetshe bakulezinsuku, amadrones azabheka imingcele ngesolokhozi, okuzenza kube nzima kakhulu ukuthi kube labantu abachapha umngcele ngokungekho emthethweni bengabonakalanga.
Esethula amadrone okuqala emngceleni weLebombo Border Post ngeviki ephelileyo, umphathintambo wogatsha lwendaba zasekhaya uMnumnzana Leon Schreiber utshele abezindaba ukuthi aseqalile ukusebenza emingceleni emihlanu ehlupha kakhulu ngokuchapha kwabantu endaweni ezingekho emthethweni. Limingcele igoqela oweBeitbridge okungena khona inengi lezizalwane zeZimbabwe.
"Sesilamehlo emkhathini. Sifuna ukuxwayisa labo abacabanga ukwephula imithetho yokungena elizweni ngokuchapha imingcele ngudlu ukuthi bazathola imbila zithutha.
USchreiber ubuye wathi sebethule njalo amacamera azafakwa ngabalindi bomngcele empahleni abazigqokileyo ngaso sonke isikhathi nxa besemsebenzini. Uthi amacamera la azabe ebonwa zinkokheli zabalindi laba azasiza ukuphungula inkohlakalo abuye aphathise njalo kwezokuphepha kwabalindi laba ikakhulu labo abasebenzela emahlathini.
Lolugatsha selwethule njalo amabhasi athengelwe ukubuyisela emuva izizalwane zakwamanye amazwe ezibanjwe ziselizweni ngokungekho emthethwen. Eminyakeni edluleyo lolugatsha beluqhatsha amabhasi ukwenza lo umsebenzi kodwa khathesi luthi sebezabuyiselwa ubuthumuthumu njengoba selulamabhasi okwenza umsebenzi lo.
Umphathintambo wogatsha lwendaba zasekhaya uMnumnzana Leon Schreiber usungula uhlelo lwama drone eLebombo Border Post. (Photo: Home Affairs Department, South Africa)
Phezu kwalezi inhlelo ugatsha lwendaba zasekhaya luqhubeka lusengeza inhlelo zokuzingela abangelamaphepha emisebenzini lezindleni.
Izizalwane zeZimbabwe zona zethula imibono eyehlukeneyo ngenhlelo zogatsha lwendaba zasekhaya lezi. Abanye bathi akusoke kusize ngalutho lokhu njengoba izimo ezifuqa abantu ukuba bengene kweleSouth Africa ngokungekho emthethweni zilokhu zisanda eZimbabwe. Umkhokheli wenhlanganiso yeProgressive Zimbabwe Foundation uMnumnzana Lance Mlilo uthi kusemandleni ayo iSouth Africa ukwenza lokhu.
"Ebesingakucela yikuthi iSouth Africa isisize kakhulu singamaZimbabwe ukwenzela ukuthi kungabi khona abangena kuleli ngokungekho emthethweni. Bangababopha laba bantu abababophayo okusalayo isiqokoqela sendaba yikuthi bahlukunyezwa yini?"
UMnumnzana Trust Ndlovu yena uthi lokho kufana lokuzama ukutshisela inyoka emlindeni ongawuvalanga uzikhohlise ngokuthi ayisoke iphume.
"Siyakwazi sonke ukuthi abantu laba babalekela indlala, babalekela izimo zakhonangale ekhaya. Ngeke kwenzeke ukuthi bangabalekeli lapho okulamadlelo engcono. Mina ngendlela engibona ngayo isisombululo esingaba khona yikuthi bonke alaba abakhuluma kakhulu bonalaba iziphathamandla zalapha eMzansi zikwazi ukukhuthaza, ukuthi eZimbabwe makulungiswe indaba zombangazwe."
Kusenjalo, kubanjwe umtshayeli wakweleSouth Africa elayitsha abantwana beZimbabwe abangamatshumi amabili lanhlanu (25) ebangenisa kweleSouth Africa. Isikhulumeli sohlangothi olubona ngokungena lokuphuma kwabantu elizweni IBorder management Authority, uNkosikazi Memme Mogotsi, uthi lokhu kutshengisa ukuthi abadlali ngala macala umtshayeli wemotale uhle wathathelwa imota yakhe waphiwa lesijeziso sokuhlawula amarandi aphose afiki izinkulungwane ezingamakhulu amathathu (R375,000).
SEE ALSO:
Udaba Esilwethulelwe NguThuso Khumalo