Ugatsha olubona ngokulondolozwa kwemingcele yakweleSouth Africa olweBorder Management Authority luthi kusukela ngoLwesibili mhlaka 1 Zibandlela soluvimbe izizalwane zeZimbabwe ezingamakhulu amabili, 200, ebezizama ukungena kulelolizwe zingelamaphepha emngceneli weBeitbridge.
Umkhokheli walolugatsha uMnu Michael Masiapato utshele intathelizindaba esemngceleni lo ngoLwesine ukuthi bavimbe njalo amabhasi avela eZimbabwe alitshumi lanhlanu, 15, alamafayindi alokhe engakabhadalwa agoqela awokujeziswa ngemva kokutholakala ethwele abantu abangelamaphepha engena labo kweleSouth Africa.
UMasiapato wengeze wathi ugatsha lwakhe soluqinise imizamo yokuvimba bonke abazama ukungena eSouth Africa ngokungekho emthethweni.
Lokhu kwenzakala ngesikhathi abeZimbabwe abanengi abasebenza kweleSouth Africa sebebuyela kulelolizwe bevela kukhefu lekhisimusi ekhaya.
Umkhokheli welinye lamabandla aphikisayo kweleSouth Africa elePatriotic Aliance uMnu Gayton Mckenzie lamalunga ebandla lakhe labo basemngceleni weBeitbridge lapho abavimba khona izizalwane zeZimbabwe ukungena lulelolizwe zingelamaphepha.
UMckenzi utshele umsakazo weeNCA namuhla ukuthi banengi abeZimbabwe asebephindiselwe emuva libandla lakhe, okugoqela oyedwa obonakale ku-video echapha umfula uLimpopo ethwele ibhayisikili.
UMckenzi uthi engangena embusweni uhulumende wakhe uzakwakha umduli omkhulu wokwenqabela izizalwane zeZimbabwe njalo uthi abazaweqa lowomduli bazasuselwa amanqe.
Isikhulumeli senhlanganiso yeZimbabwe Community in South Africa uMnu Bongani Mkhwanazi utshele iStudio 7 ukuthi bayawasola kakhulu amazwi kaMckenzie.
Your browser doesn’t support HTML5
Ingxoxo loMnu Bongani Mkhwananzi