Ikomiti yephalamende yakweleSouth Africa ebona ngezempilakahle ithi ohulumende abangomakhelwane kufuze behlawuliswe nxa izizalwane zabo zingelatshwa ezibhedlela zikahulumende kweleSouth Africa.
Ikomiti le ithi izibhedlela lamakininika kahulumende kweleSouth Africa kudonsa nzima ngenxa yezizalwame zakwamanye amazwe eziza kuleli zizodinga ukwelatshwa.
Ilunga lale ikomithi njalo engowebandla leDemocratic Alliance uNkosikazi Michele Clark, uthi ngenxa yokuthi umthetho weSouth Africa awuvumi ukuthi umuntu osengene esibhedlela edinga usizo abuyiselwe emuva, kufanele ukuthi nxa abokuza laba sebeyelatshiwe kuthunyelwe ugwalo lwenhlawulo kubohulumende babo.
Hospitals in South Africa
Uthi loludaba kufanele kuyekhulunywa ngalo emhlanganweni wenhlanganiso yamazwe asezansi yezwekazi leAfrica iSADC.
“Nxa odokotela bakwamanye amazwe bethumela izigulane zabo kweleSouth Africa kufanele kube lendlela yokuhlawulisa ohulumende bamazwe abasuka kuwo.”
Ukubhidlika kwezempilakahle eZimbabwe sekubangele ukuthi inengi labafuna ukwelatshwa bangene kweleSouth Africa lapho abafike belatshwe khona mahala ezibhedlela zikahulumende.
Umkhokheli kahulumende wesabelo seLimpopo esingcelelane leZimbabwe uNkosikazi Phophi Ramathuba usekhulume waze watsha ilizwi ngaloludaba esithi abeZimbabwe abazobeletha labazokwelatshwa imikhuhlane ethile bagcwele kulezi zibhedlela osekusenza zehluleke ukwelapha izakhamizi seLimpopo. Layeke uthi kufanele ohulumende babantu bokuza bahlawule indleko zokwelatshwa kwabantu babo.
“Akulunganga ukuthi umuntu alimale khonale elizweni lakhe asukume agijimele ngapha eLimpopo ukuzokwelatshwa kukanti lathi silazo lapha izigulani ezilindele ukwelatshwa.”
Isizalwane sakweleSouth Africa njalo obona ngokuqoqwa kwenhlelo zebandla leSofasonke Party, uMnumnzana Freeman Bhengu, uthi linyathelo elihle kakhulu elihlongozwa yikomiti yezempilakahle.
Hospitals in South Africa
“I health system yaseSouth Africa is overburdened by Zimbabweans, Mozambicans, Abasotho. So, I think it’s a right way and it’s about time government starts billing our foreign neighbours for whatever we are doing for their citizens lana eSouth Africa. May be the issue should also be extended ku issue of deportation. May be countries should also start paying for amadeportation of their illegal immigrants in South Africa.”
Izizalwane zeZimbabwe lazo sezethule imibono ehlukeneyo ngenkuthazo yekomiti yezempilakahle le. Umqondisi enhlanganisweni yePhoenix Foundation of Zimbabwe, uMnumnzana Dumisani Nleya, uthi vele kungumlandu wala mazwe ukuhlawulela abantu bawo.
“Kungumkhumbulo omuhle kakhulu. Kodwa ngapha ehlangothini lweZimbabwe kuzaba leproblem ngoba igovernment yeZimbabwe ayisoze iqhubeke ibhadala. Ingaqala ivume kodwa ekugcineni ayisoze ibhadale. Uhulumende weZimbabwe uyaziwa ngokuba ngumuntu ongabhadali isikolodo.”
Hospitals in South Africa
Umphathintambo wogatsha lwezempilakahle kweleSouth Africa, uMnumnzana Aaron Motsoaledi, laye uke waluphatha loludaba ngenyanga ephelileyo esithi okwenziwa yiZimbabwe kufana lobaba othuma abantwabakhe ukuthi beyekudla komakhelwane.
Leyinkulumo ephendulwe ngamazwi entukuthelo yisikhulumeli sikahulumende weZimbabwe uMnumnzana Nick Mangwana yena obhale ehlelweni lwezokuxhumana kuX esithi inkulumo kaMotsoaledi le ilokucwasa ngobuzwe.
SEE ALSO:
Udaba Esilwethulelwe NguThuso Khumalo