EleRussia kulez’insuku lisebenzisa indlela ezinengi zokusabalalisa imibiko yalo kuzwekazi leAfrica.
Lokhu kwenzakala ngesikhathi ilizwe leli, eleMelika lele China ezama ngamandla wonke ukugxhila impande kuzwekazi leAfrica, ikakhulu kwezokulima, ezemfundo, ezomvikela lokunye.
EleRussia lisebenzisa umabonakude oweRussian Television International, inkundla yokuxhumana eyeTelegram lezinye ekusabaliseni imibiko abanye abantu abathi ingamanga egoqela ezomvikela lokunye okumayelana lamanye amazwe kuzwekazi leAfrica agoqela eleZimbabwe, Chad, Niger, Mali, Senegal, Zambia lele Guinea.
Kunengi okutholakala ikakhulu enkundleni yeTelegram eveza okungenzelwa abadabuka emazweni atshiyeneyo abezwekazi leAfrica abafisa ukuyafunda kwele Russia, ukungena kubutho, kwezokulima lakwezempilakahle.
Konke lokhu kuveza okuhle kodwa hatshi okubi abantu abangabhekana lakho bengadlelana lele Russia. UMongameli Emmerson Mnangagwa lomkhokheli wakwele Russia uMnu. Vladmir Putin balobudlelwano obumangalisayo, obusolwa ngezinye izizalwane zeZimbabwe.
Loba kunjalo, eleRussia likhanga eleZimbabwe ngendlela ezitshiyeneyo ukuba lidlelana lalo. Sehlulekile ukuxhumana leziphathamandla zikahulumende wakwele Russia ukuze sixoxisana ngokwenziwa lilizwe leli okuthiwa lethula imibiko engamanga sonke isikhathi.
Intathelizindaba esebenzela ewofisini yeMedia Institute of Southern Africa eHarare, uMnunzana Nqaba Matshazi, uthi ukukhipha indaba eziyize, imisinformation kanye le-disinformation, sekuvamile ngesikhathi kulokulwisana phakathi kwamazwe afana leRussia kanye leMelika.
“Sikhangela kulamazwe aqinisa indlela akhuluma kakhulu lamazwe e Africa. Ele Russia selizama ukuthi lisondele kakhulu kumazwe eAfrica lokhe kwaqala impi ye Africa.”
UMatshazi uthi kumele uzulu aqhaphele ukuthi indaba lezi zilethwa kanjani kuzwekazi leAfrica.
“Kuqakathekeli njenge Africa ukuthi sikwazi ukuthi indaba lezi zivela ngaphi njalo sizithola njani ukwenzela ukuthi kungabi le misinformation le disinformation. Sibona indaba lezi zingena kakhulu ngendawo zokuxoxisa isocial media.”
Oqeqetshe kuzifundo zokukhitshwa kwembiko, eze-information dissemination, esekolitshini le-University of Botswana, uMnunzana Thomas Nkhoma, minengi imibiko engamanga eyethulwa ngele Russia elalelwa ngabohulumende lozulu.
“Ukusebenzisa umkhankaso we misinformation le disinformation, kuyabhadala njengalokhu esisikubona eleRussia likwenza. Abantu makhaza abalandlela zokuhluza ukuthi kambe okuliqiniso yikuphi, okungayisikho yikuphi.”
Ocubungula ezombusazwe, uMnunzana Zenzo Moyo, uthi lokhu ayisikho kwakuqala ukuthi amazwe angentshonalanga asebenzise indaba eziyize ukuthi bethole ubudlelwano lezwekazi leAfrica.
“Ayisiyo nto entsha. Amazwe womabili ayakuyenza lokhu. Kufana lokuba lenkunzi ezimbili othola ukuthi zizama ukutshengisa ukuthi elamandla yiphi. EleMelika lingabe lihlaba umkhosi ngoba selibonile ukuthi ungathi silahlekelwa ngamandla kulawo mazwe.”
Ngesikhathi kusanda kuqhutshwa umhlangano omkhulu
obuqoqwe libutho leMelika elikhangela ngezomvikela eAfrica, ele U.S-Africa Command kumbe iAFRICOM eGaborone, kwaphuma ukukhathazeka phezu kokumemetheka kwemilayezo engaqondanga iphuma elizweni le Russia.
Umqondisi wenhlanganiso yeAFRICOM, uMnunzana Michael Langley watshela intathelizindaba ekupheleni komhlangano ukuthi eleMelika liyakhathazeka ngembiko eyize ephuma kwele Russia, esithi ilakho ukumemethekisa ingxabano evele isikhona.
"Kulobudlelwano phakathi kukungahlaliseki kanye lokukhipha imbiko eyize. Liqiniso lelo. Ngakho kuqakathekile ukuthi kulwiswe ukutshiwa kwembiko engaqondanga ngoba kulakho ukudala ukuchitheka kwegazi.”
EleMelika likhala ngokuthi ukusabalalisa imilayezo eyize ngele Russia kwamanye amazwe angentshonalanga yezwekazi leAfrica, sekudale ukuthi ibutho lalo liphume emazweni afana leNiger.
Emhlubulweni wezansi kwezwekazi leAfrica, uMnangagwa usanda kutshela uPutin ukuthi eleMelika lisekela eleZambia kanye lele Malawi kwezomvikela, ukwenzela ukutshiphisa eleZimbabwe.
EleMelika njalo lalandula ukuthi lizwana lele Zambia ngenxa yokuthi lifuna ukufaka inkamba yebutho layo kulelolizwe.
SEE ALSO:
Udaba Esilwethulelwe nguMqondisi Dube