Kulequla likahulumende weMelika elifike eHarare ngoLwesithathu ngenjongo yokuyahlaziya ezombusazwe, ezenotho kanye lokutshiyeneyo okuphathelane lenhlalakahle kazulu.
Iqula leli lilamalunga amahlanu njalo likhokhelwa nguMnu Gregory Meeks yena oke wakhokhela njalo elinye iqula elethekelele kweleZimbabwe ngoMpandula nyakenye.
Isikhulumeli sesigodlo seMelika eZimbabwe uMnu Tim Gerhardson utshele iStudio 7 ukuthi iqula leli lizahlangana lenkokheli yamabandla abumba uhulumende womanyano bekhuluma ngodaba lwezombusazwe ikakhulu isivumelwano seGlobal Political Agreement.
Uhambo lwequla leMelika lolu luza ngemva kokuba umanyano weEuropean Union wazise ngoMvulo ukuthi usuqhelise izijeziso zawo kuziphathamandla zeZanu PF. IMelika ngelinye lamazwe ethese iziphathamandla zeZanu PF kanye lamankampani alobudlelwano lebandla leli izijeziso.
Ingcwethi ehlaziya ezombusazwe uMnu Samukele Hadebe utshele uNtungamili Nkomo weStudio 7 ukuthi iMelika ilakho ukulandela inyathelo leEU elokuqhelisa izijeziso ngemva kohambo lwequla layo ngoba kungala nguquko emqoka esibe khona kwezombusazwe.