EleMelika lithi likhathazekile ngokwephulwa kwamalungelo oluntu lenkohlakalo ememetheka kwele Zimbabwe.
Lithi lobanje kulabanye abasanda kukhitshwa kuzijeziso zenotho kunsukwana ezedluleyo, kuqhubekela phambili ukukhahlanyezwa kukazulu yinkokheli yebandla leZanu PF labadlena labo.
Kodwa ibandla elibusayo lithi kazesulwe zonke izijeziso zenotho abazifakelwa nguhulumende wakwele Melika lamanye amazwe.
Lokhu kuphume emhlanganweni namuhla eHarare owenziwe ngophethe isigodlo seMelika eZimbabwe, uMnu Laurence Socha, othe iZimbabwe iqhubeka isehluleka ukuhlonipha ilungelo loluntu. USocha uthe ukukhitshwa kwezijeziso zamanye amankampani labanye abantu akutsho ukuba sesiguqukile isimo sezombusazwe eZimbabwe.
“Siqhubeka sikhathazeka ngezehlakalo zenkohlakalo kwele Zimbabwe kanye lokuhlukunyezwa kwamalungelo oluntu. Abantu abehlukeneyo abagoqela abakuhulumende yibo abenza lokhu.’’
Uthe eleMelika lizakwenza ukuba izijeziso zenotho zihambelane lesikhathi njalo zifakelwe kumbe ziqiniswe kulabo abahlukumeza uzulu labenza inkohlakalo labadlelana labo.
USocha uphinde wathi eleMelika likhuthaza eleZimbabwe ukuba lenze kube lombuso wentando kazulu ongela kuthandabuza ukuze liphumelele. Uphinde wathi lokhu ukhona umthetho owethulwa lidale leCongress kwele Melika olezijeziso zenotho obizwa ngokuthi yiZimbabwe Democracy and Economic Recovery Act.
EleMelika lisanda kufakela uMongameli Emmerson Mnangagwa, umkakhe uNkosikazi Auxillia Mnangagwa, umsekeli kamongameli uMnu. Constantino Chiwenga labanye kanye lamankampani ambalwa izijeziso zenotho eseziphansi kweziqondiso zedale leCongress eze-Global Magnitsky Program. Uhlelo lweziqondiso ezintsha lezi luqhutshwa luhlangothi lukahulumende olubona ngezempahla yakwamanye amazwe olwe-Office of Foreign Assets Control njengalokhu okwenziwa phansi komthetho weZIDERA.
Kodwa uhulumende weZimbabwe usole kakhulu okwenziwe ngele Melika esithi akumelanga atshelwe okokwenza lilizwe leli.
Obona ngokwethulwa kwemibiko kahulumende okumayelana lamanye amazwe uMnu. Richard Mahomva uthi eleZimbabwe kalifuni ukuzwa ngitsho lakancane ngezijeziso zenotho.
‘’Izizatho zezijeziso lezi ayisizo zakuqala njalo siyakwazi ukuthi lokhu kudala bakutsho kungelani lenguquko eseZimbabwe. Esikubonayo yikuthi siyaphumelela kungelani lezijeziso zabo.’’
EleZimbabwe lethule umbiko ngoLwesithathu kusihlwa othi kumele zesulwe izijeziso lezi ngoba zikhahlameza uzulu. Lithi izijeziso lezi zifana xhathu ngezethulwa lidale leCongress njalo lokbekusethulwa iminyaka yonke yinkokheli yakwele Melika.
UMnu. Richard Gandari owebandla leZanu PF uthi akumelalanga abaphathintambo bebandla leZanu PF behlabe umkhosi ngezijeziso zenotho ngoba bathwalise nzima uzulu eZimbabwe.
Abaphikisayo bathi eleZimbabwe kumele liguqule izenzo ukuze zesulwe izijeziso zenotho.
UMongameli Joseph Biden usanda kuyekethisa izijeziso zenotho eziphansi kohlelo lwezinqumo ezafakelwa abephula ilungelo lolunto lokunye ngomnyaka ka2003 zaqiniswa ngomongameli abatshiyeneyo ngokuya kwesikhathi ngenxa yokuqhubekela phambili kokukhahlanyezwa kukazulu.
UBiden wathi izijeziso esezesulwe phansi kweziqondiso zomthetho owe-Executive Order 13288, kaziselancedo ngakho-ke wakubona kufanele ukuthi zibekwe eceleni.