Uhulumende weMelika loweBhilithani sebethese abantu abayisitshiyagalolunye, 9, kanye lamankampani alitshumi lasitshiyagalolunye, 19, izijeziso zenotho ngoba besithi yibo abantshontsha igolide leZimbabwe.
Abantu laba bagoqela obikwa eyingqungquthela uMnu Kamlesh Pattni, yena ophume kufilimu yomsakazo weAl Jazeera nyakenye ekhuluma ngokuthi uhuquluza njani igolide leZimbabwe njalo esithi usebenza loMongameli Emmerson Mnangagwa.
Ugatsha lukahulumende waseMelika olubona ngezijeziso olweOffice of Foreign Assets Control (OFAC) luthi uPattni labangane bakhe baphuca abantu beZimbabwe inotho yabo ngokukhipha igolide elizweni ngokungekho emthethweni besiyalithengisa kwamanye amazwe.
UPattni labanye bakhe betheswe izijeziso lezi izolo ngosuku lokunanza imizamo yokulwisana lenkohlakalo emhlabeni jikelele olweInternational Anti-Corruption Day.
UMnu Pattni yisizalwane sakweleBhilithani njalo ulobuzwe bakweleKenya, lapho etheswa khona umlandu wokuntshontsha igolide elingena kuzigidi lezigidi zamadola aseMelika eminyakeni edluleyo.
Umkakhe lomlamu wakhe labo bafakelwe izijeziso ezivala inotho yabo esemabhanga afinyelelwa zingatsha zomthetho zikahulumende waseBhilithani loweMelika.
EleZimbabwe lilahlekelwa ligolide elibiza i-billion elilengxenye, US$1.5 billion ngomnyaka ngenxa yabantu abeba igolide besiyalithengisa phandle ngokungekho emthethweni.
Ocubungula ezombusazwe uMnu Mthulisi Mathuthu utshele iStudio 7 ukuthi abantu beZimbabwe ngokwabo kumele bathathe amanyathelo okuvikela inotho yabo.
Your browser doesn’t support HTML5
Ingxoxo loMnu Mthulisi Mathuthu