Isigodlo someli weJapan leseChina namuhla ziphe eleZimbabwe usizo lwemali lokudla okuzaphathisa abantu abahlaselwe yindlala.
Ukudla lokhu, okwamukelwe nguMongameli Emmerson Mnangagwa, yirayisi elesisindo samathani azinkulungwane phose ezimbili, 1,760 tonnes, okuvele eChina.
UMnangagwa ubonge uhulumende wakweleChina ngalolusizo wathembisa ukuthi akulamuntu ozakufa ngendlala eZimbabwe.
Usizo lweJapan ngolwemali edlula isigidi samadola aseMelika, US$1,4 million.
Imali le iphiwe inhlanganiso ephathisa abalambayo phansi komanyano weUnited Nations eyeWorld Food Program (WFP), yona ethi izaphathisa abantu abazinkulungwane ezingamatshumi phose amathathu, 26,000.
Uhulumende uthi abantu ababhekane lendlala eZimbabwe bayizigidi eziyisitshiyagalolunye, 9 million, kanti njalo kufuneka imali edlula amabhiliyoni eMelika amathathu, US$3,3 billion yokubathengela ukudla.
Isiphathamandla senhlanganiso esebenza lozulu wemaphandleni eyeRural Community Empowerment Trust uMnu Vumani Ndlovu utshele iStudio 7 ukuthi kusakunengi okumele kwenziwe ukuze uzulu weZimbabwe ahlengwe endlaleni.
Your browser doesn’t support HTML5
Ingxoxo loMnu Vumani Ndlovu