EleIsrael selilungiselela ukuhlasela eGaza Strip lapho eselitshele bonke abantu abahlala enyakatho yendawo le ukuba besuke ngoba lizangena ePalestine ngamandla amangalisayo ukwenzela ukubulala bonke abadlelana leHamas.
Kodwa abokholo lweSiMloslem bathi kumele eleIsrael limise impi le ngoba kulakho ukuba eleIran lamanye amazwe angenele empini le.
Ibutho lakwele Israel selihlome laphelela lajama emgceleni weGaza Strip limelele ukunikwa imvumo ngumkhokheli wabo uMnu. Benjamin Netanyahu ukuba lihlasele iHamas.
Lokhu kwenzakala ngesikhathi abezindaba abeReuters bebika ukuba sekubulewe abantu abafika phose inkulungwane ezintathu lengxenye eGaza kuthi kwele Israel sebefika phose inkulungwane lengxenye – 1,400.
EleMelika selithume uMnu. Anthony Blinken, okuhlangothi lukahulumende wakwele Melika olubona ngokudlelana lamanye amazwe, wethekelela amazwe abokholo lweSiMuslim agoqela eleSaudi Arabia, Egypt lamanye.
UBlinken uthi kubi okwenziwe yiHamas kwele Israel. Kwele Melika, uMongameli Joseph Biden laye uthi basekela eleIsrael empini le.
Kodwa uPrince Faisal bin Farhan, okuhlangothi lukahulumende wakwele Iran olubona ngokudlelana lamanye amazwe, uthi kumele eleIsrael limise impi le.
EleZimbabwe lithi kumele eleIsrael likhumusane umlotha leHamas ngoba impi le kayilunganga. Abokholo lweSiMoslem eZimbabwe bathi eleIsrael liloqhweba okwenza ukuba iHamas ibahlasele. USheik Bilaal Gwenzi ulombono lo. Inhlanganiso yeUnited Nations ithi abantu abedlula isigidi – 1,600 million kabasela ndawo yokuhlala eGaza Strip kulandela ukubhobha okwenziwa ngele Israel.