Iqembu leGuinea linqobe eleEquatorial Guinea 1-0 emdlalweni weAfrica Cup of Nations odlallwe namuhla kwele Ivory Coast.
Namuhla kusihlwa eleEgyt lizangqikilana lele Democratic Republic emdlalweni ofanayo kusigaba samaqembu alitshumi lasithupha – 16.
Kusenjalo, abalandeli bomdlalo wenguqu bathi kukhangelelwe ukuba kusasa iqembu leSenegal lizakhupha iqembu elimela ilizwe eliqoqe umncintiswano weAfrica Cup of Nations odlalwa kulezinsuku eleIvory Coast.
Iqembu leSenegal lidibana leleIvory Coast kusasa ntambama emdlalweni wesigaba sesibili kumncintiswano lo. Owayengumgadli weqembu leZimbabwe elamaWarriors elamela ilizwe kumncintiswano weAfrica Cup of Nations ngo2004 uAgent Sawu uthi iqembu leSenegal liqine kakhulu okokuthi alingeke limiswe ngeleIvory Coast.
“Angiboni ukuthi eleSenegal lingadliwa ngeleIvory Coast ngoba litshengisile ukuba zingqungquthela ikanti lembali yalo iyatshengisa ukuba liqhuba kuhle. Ngikhangelele ukuthi bavele bazaphinda bayiphakamise inkezo ngoba ungakhangela amanye amazwe afana laboNigeria angabe edlulele phambili kodwa awadlali kuhle.”
Intathelizindaba yezemidlalo uNash Mkokwayarira uthi loba nje imidlalo yalonyaka ilezimanga ngoba sekuphume amanye amaqembu abekhangelelwe ukuba azakwenza kuhle, iqembu leSenegal lizaqhubekela phambili lize lifinyelele kufinal.
“Imidlalo yeAfcon leyi itshengisele wonke umuntu ukuthi akusela ukuthi kuleqembu okumele lithathe kodwa lonke iqembu elincintisayo liyafuna lalo ukuthatha. Mina ngibona angazathi iqembu leMorocco leleSenegal atshovile sibili kodwa singakhangeleli phansi iqembu leCape Verde. Nxa sikhangela indlela abadlale ngayo ngemuva ngibona angani elinye lamaqembu lawa lingayithatha inkezo.”
Komunye umdlalo muhla kusihlwa, iqembu leEgypt lidibana leleDemocratic Republic of Congo. Othengisa ezibandayo edolobheni lakoBulawayo uPhilani Tangu Sibanda uthi amaGipite azaphumelela ukuya kusigaba esilandelayo.
“Kumdlalo ophakathi kweSenegal leIvory Coast iqembu leSenegal lizaqhubekela phambili kuthi phakathi kweEgypt leDRC eleEgypt kusobala nje ukuthi ngumthwalo olula kuEgypt. Iqembu leEgypt ngendlela engine ngakhona sekufuna ukuyilahla izakwenza lokhuyana okwenziwa yiSenegal kuqala. Yilawana amaqembu athi angavele angene ku knockout stage awasadleki.”
Intathelizindaba yezemidlalo uFortune Mbele uthi sekungenzeka loba yini phakathi kweEgypt leDemocratic Republic of Congo.
“Kumidlalo yakusasa ngibona angani zindala zombili phakathi kweEgypt leDRC njalo loba yiliphi iqembu linganqoba. Emdlalweni ozakuba phakathi kweSenegal leIvory Coast ngibona angani iqembu leSenegal lizadlulela phambili ngoba liqine kakhulu njalo nxa sikhangela lokuthi eleIvory Coast belidlala njani emidlalweni eyedluleyo.”
Iqembu leAngola kanye leleNigeria asefinyelele kusigaba same quarter–finals ngemva kokuba eleAngola litshaye eleNamibia nge3 ka nya kuthi eleNigeria lona linqobe eleCameroon nge 2 ka nya ngoMgqibelo.
SEE ALSO:
Udaba Esilwethulelwe NguJoseph Njanji