Umphathintambo obona ngobudlelwano beZimbabwe lamanye amazwe womhlaba, uMnu. Frederick Shava uthi eleBotswana selithembise ukuhlaba ijekiseni yeCovid-19 Vaccine, bonke abeZimbabwe abahlala eBotswana, kungakhathelekile ngesimo sabo samaphepha okuhlala elizweni.
UShava okade evakatshele omunye wakhe wakweleBotswana ngoLwesibili, uthi uyajabula ngesithembiso seBotswana esokuhlaba bonke abeZimbabwe abahlala kulelizwe.
Bekulokukhathezeka ukuthi abanye abeZimbabwe abahlala eBotswana, ikakhulu abangene okungekho emthethweni, balakho ukuyeqiwa ngesikhathi sokuhlaba ijekiseni yeCovid-19.
UShava uthi uthenjisiwe ngumphathintambo obona ngobudlelwano beBotswana lamanye amazwe, udokotela Lemogang Kwape, ukuthi akulamuntu ozatshiywa phandle kumkhakanso wokuhlaba ijekiseni yeCovid-19.
“Siyazisiwe ngumphathintambo wakweleBotswana ukuthi kuyindlela yabo yokuthi bonke abeZimbabwe behlatshwe ijekiseni. Siyakubongela lokhu. Lathi sizahlaba bonke abeBotswana abahlala emzini esemngceleni yeZimbabwe.”
Kodwa abeZimbabwe kweleBotswana bathi bazabona ngezenzo ngoba besethuswa yikuthi uma begcwalisa amaphepha okuhlatshwa, kulalapho okudingakala ukuthi kulotshwe inombolo yephepha lokuhlala eBotswana, iresidence permit.
Umnunzana Mthabisi Dube uthi ukudingakala kwe information le, kungatsho ukuthi labo abangalamaphepha okuhlala eBotswana bazakuba semsileni ekutholeni ijekiseni yeCovid-19.
“Siyezwa ukuthi eleBotswana lizahlaba bonke abeZimbabwe ijekiseni yeCovid-19, kodwa esezibuza khona yikuthi kungani, uma kugcwaliswa amaphepha okuhlatshwa ijekiseni, kufanakala inombolo ze residence permit. Uma ungelayo kwenzakalani? Yindaba kudingakala konke lokhu?”
Kusenjalo uShava uthi kulokunengi amazwe womabili azakuhlafuna emhlanganweni obanjwa mnyaka wonke oweBi-National Commission okhokhelwa ngomongameli Mokgweetsi Masisi loEmmerson Mnangagwa.
Lonyaka lithuba leZimbabwe ukuba yinkundla yalomhlangano, uShava esithi bakhangelele ukuthi mhlawumbe ungaba seVictoria Falls, ngoba idolobho leli selihambe isibanga esithile ekuhlabeni abantu ijekiseni yeCovid-19.
“Asikavumelani ukuthi umhlangano uzabanjelwa ngaphi, kodwa ngenxa yesibanga esisihanjiwe ekuhlabeni ijekiseni yeCovid-19 iVictoria Falls, umhlangano lo ungabanjelwa eVictoria Falls.”
Kwezinye indaba, uShava uthi eleZimbabwe likhangelele ukungena kuhlelo lwebholoho lweKazungula.
Kodwa uthi iZimbabwe iqhubekela phambili ngokuthuthukisa umngcele weBeitbridge, ukuze uqhubeke ukhanga amaloli athwala imphahla evela emazweni atshiyeneyo.
Kulokwesabela ukuthi eleZimbabwe lizalahlekelwa yimali enengi kulandela ukuvulwa kwebholoho leKazungula lona elixhumanisa iBotswana leZambia, njalo libonwa njengomkhandlo ongenisa amaloli emphahla kumkambo esenyakatho yeAfrica.
Your browser doesn’t support HTML5
Udaba lohlelo lokuhlatshwa kwabeZimbabwe abaseBotswana ijekiseni yeC19 Vaccine siluphiwa nguMqondisi Dube