Amatitshala aweZimbabwe adinga umsebenzi kweleBotswana abhekane lobunzima bokuwuthola ngesikhathi uhulumende walelo lizwe esekhangela ukuqhatsha izizalwane zakhe kuqala.
Umnyaka ka2015 uphele izikolo ezinengi kweleBotswana zigumula amatitshala avela kwamanye amazwe inengi labo kungabavela eZimbabwe.
Ukuqala kuka2016 akulamehluko omnengi ngoba abaqhatshi bebikwa befuna incwadi enikeza imvumo yokufundisa kweleBotswana –ipermission to teach- engatholwa kalula linengi.
Abanye ababalisi ababaleka eZimbabwe ngenxa yesimo sokuphuza okuhola kanye lokulahlekelwa yimisebenzi, bazithola bevalelwe ngaphandle ngoba amathuba okufundisa enciphile.
Izikolo ezizemele zodwa zibike inani eliqongileyo labadinga umsebenzi wokubalisa kodwa incwadi zemvumo yokufundisa azisaphumi lula kuhulumende weBotswana
Umnumzana Ozias Mvundla uthi yena ube dinga umsebenzi wokubalalisa okwesikhatshana eBotswana, engene ekuqaleni komnyaka kodwa uthola kulugwadule. Uthi kumgceke ukuthi iBotswana isikhangele ukunikeza abantwabayo amathuba…
Kukanti umnumzana Thembani Malunga uthi yena ube ephakathi kodwa walahlekelwa ngumsebenzi ngoba engatholi imvumo yokubalisa noma nje eqheqhetshe okweneleyo.
UJoseph Ndlovu uthi ukuba ngumbalisi sekulahlekelwe yisithunzi ngenxa yendlela ababalisi abaphathwa ngayo. Uthi bazithola bephakathi kwelitshe lembokodo ekhaya kanye laphandle kwelizwe.
Uhulumende weBotswana uthi uzama ngamandla ukuthi imisebenzi yokubalisa ibe sezandleni zabeBotswana ngesikhathi ilwisana lokusilela kwemisebenzi.
Ukuba ngutitshala eZimbabwe akusakhwabitheki ngesikhathi isimo sokusebenza siphansi bengatholi iholo ngesikhathi kukanti uhulumende uthembisa ukuquma iholo uma abantwana benga yenzi kuhle emihlolisweni.
Your browser doesn’t support HTML5
Udaba Silethulelwa NguMartin Ngwenya