EleBelarus ithi lizaqhubekela phambili lidlelana lele Zimbabwe kwezokwemba, ukuthengiselana imitshina yokulima lokunye okuthuthukisa umnotho wamazwe la. Kodwa kulabanye abathi kabakuboni eleZimbabwe elikuthola kwele Belarus okungani lidlelana kuphela lenkokheli yelizwe.
Ubudlelwano bamazwe la bunconywe namuhla ngabamele uhulumende wakwele Belarus lowe Zimbabwe ngesikhathi behlolisisa izivumelwano ezalotshelwana yinkokheli yamazwe la.
Ekhuluma emhlanganweni owenziwe phakathi kwamazwe obona ngobudlelwano phakathi kwele Belarus lamaze ezwekazi leAfrica, uMnu Yuri Nikolaychik, othe umhlangano lo ubujonge ukuqinisa izivumelwano zokuthengiselana.
‘’Silungise ubudlelwani obavunyelwana yi nkokheli yethu, njalo ukuba sikhangele ukuba singasebenza sonke njani ukulungisa lokhu okwakhulunywa ngu Mongameli Mnangagwa lapho esiya eBelarus.’’
Lokhu kugcizilelwe nguNkosikazi Rofina Chikawa, osaphethe isikhundla somphathintambo wohlangothi olubona ngokudlelana amanye amazwe. “Ngesikhathi uMongameli Mnangagwa esethekelela ele Belarus, wethekela ilizwe lenu wah;langana lo mongameli Lukashenko lapho okwalungisiswa ugatsha lwezokulima, olukulima leznye ingatsha.’’
Ingcitshi kwezomnotho zithi lobanje kuqakathekile ukuba eleZimbabwe lidlelane lamazwe wonke kumele kucace ukuba ilizwe lithola imali enganani ngobudlelwano lobu. Ziqhubeke zisithi akucaci ukuba eleZimbabwe lizatholani okubambekayo ngokuzwanana lele Belarus.
Eyinye yalezi ngcitshi esebenza kunhlanganiso yeDisability Centre nguMnu Masimba Kuchera.
“Kuqakathekile ukuthi ele Zimbabwe lidlelane lamanye amazwe kodwa udubo esilubonayao yikuthi ubudlelwano lobu sibenza kulemfihlo enkulu kakhulu, iphalamende kayitshelwa okwenzakalayo.’’
EleZimbabwe lalobela izivumelwano kwezokwemba, ezokulima ezokwethekelelwa kwamazwe lokunye ngomnyaka ka2023.
Kusenjalo, isigodlo sakwele Namibia namuhla sibambisane labe Museum of African Liberation wenze isikhumbuzo sokuthakazelela impilo kamuyi uHage Geingob, owayekhokhela eleNamibia.
UGeingob uchazwe njengomuntu owasebenzela ukuba uzulu wezwekazi leAfrica athole uzibuse
Omunye okade esebuthanweni longu Mnu. Methuseli Sibindi othi eleZimbabwe likhala ndawonye lele Namibia.
UGeingob ubhubhe mhlaka 4 kuyonale inyanga eseleminyaka engamatshumi ayisitshiyagalombili lambili -82. Wabulawa ngumkhuhlane wemvukuzane.