Uzulu we Zimbabwe lengcitshi kwezombusazwe zithi ugatsha lwezemali kumele lwabele imali enengi kungatsha ezibona ngenhlalakahle kazulu ikakhulu kunhlelo zokunakekela abaswelayo abayibo abathwele nzima elizweni elilesimo somnotho ongamanga kuhle.
Lokhu kuza ngesikhathi abakahulumende weZimbabwe sebesungule uhlelo lokuthola imibono eyehlukeneyo kuzulu ngokuba ahlele njani uluhlu lwendleko lokubuthaniswa kwemali engasetshenziswa nguhulumende olweNational Budget yomnyaka ka 2021.
Uzulu uthi lobanje uhulumende elengatsha ezifanele zinakekele abaswelayo lalabo asebebadala kakula okunengi osekwenziwe ukuze abantu laba baphathiswe.
Ingcitshi kwezombusazwe uMnu Tjenesani Ntungakwa uthi kumele uhulumende abele imali kugatsha lwe Social Welfare lona athi lunganceda kakhulu ukwehlisa inhlupho zalabo abaswelayo.
“Kubanzima ukuthi sikholwe ukuba bayazihlupha ngokudubeka kwabantu. Abantu makhaza kumele baphiwe ukudla. Ukubona kwami angila Themba ukuba lapho esiyakhona lomphathintambo wezemali kuqondile na ikakhlu kubantu makhaza”
Uqhubeke ethi imali etholwa nguzulu oswelayo okwakhathesi kayeneli lutho esithi abanengi badla inqweqwe zomlomo.
“Uzathola ukuba ezinye ugatsha lokulima luzathola imali, olwe Defence lolwe Home Affairs luzathola. Abaswela imali yilabo abaqondane lokuphila kwabantu”
Omela inhlanganiso ye Community Working Group on Health uMnu Itai Rusike yena uthi imali eyabelwa ugatsha lwezempilakahle kumele yengezwe.
“Uhulumende kancedi kakhulu kundaba zezempilakahle. Ugatsha wezempilakahle uyabe ekhangelela ukuba imisebenzi yempilakahle ibe ngcono. Imali abayiphiwayo incane kakhulu”
Lokhu kusekelwe ngowake waba ngumphathintambo wezempilakahle uDokotela Henry Madzorera othi uhulumende kumele abone ukuba uhlela kuhle ekwabeni iBudget yakhe ngalezi zikhathi zokoniwa komnotho yikuqhamuka komkhuhlane weCovid 19.
“Umehluko phakathi kwemali abayipha iMinistry of Health laleyo abayicelileyo incane. Kumele baphiwe imali eneleyo. Ukupha odokotela labongi imali engathengiyo kuyaphambanisa ugatsha lwezempilakahle”
Uhlelo lokubuthanisa imibono kazulu ukuze uhulumende azwisise indingeko zikazulu ngenjongo yokusebenzisa lolo lwazi ukuhlela uluhlu lokubuthaniswa kwemali kahulumende lendleko zengatsha zakhe zonke, olweNational Budget, luqale kunyenga edluleyo. IBudget yomnyaka ozayo ka2021, ikhangelelwe ukwethulelwa ilizwe ngumpathintambo wezemali, uMnu. Mthuli Ncube yonale inyanga kaLwezi ingakapheli.
Your browser doesn’t support HTML5
Udaba Esilethulwe NguMlondolozi Ndlovu