Ele Zimbabwe libikwa selivumelane lele Malawi ukuthi lizabhadala ingxenye yesikwelede esedlula izigidi ezingamatshumi amabili zamadollar eMelika – $23 million – sokuthenga umumbu kulelolizwe nguhulumende we Zanu PF esabusa eyedwa.
Iziphathamandla zikahulumende weMalawi ezigoqela uMnu. Cassim Chilumpha owayengumsekeli kamuyi uMongameli Bingu Wa Mutharika zikhulumisane leziphathamandla zikahulumende eHarare kwavunyelwana ukuthi imali le kumele ibhadalwe ngokutshetsha.
Abazi ngokwenzakalayo bathi amazwe la avumelane njalo ukuthi imali eseleyo kumele ibhadalwe umnyaka lo ungakapheli.
IStudio 7 kayenelisanga ukukhuluma leziphathandla zikahulumende we Zimbabwe le Malawi ngalolu daba.
Ele Zimbabwe lathenga umumbu oyisilinganiso samatonnes edlula inkulungwane ezingamatshumi ayisithupha – 66,000 thousand tonnes - kwele Malawi yehluleka ukuwubhadalela ngenxa yobudlelwano bobungane bukaMongameli Robert Mugabe lo Bingu Wa Mutharika.
Umnu. Idriss Nassah intathelizindaba ye Daily Times ye Malawi ithi imali ekhangelelwe ukubhadalwa yi Zimbabwe izahle idluliselwe phambili iye setshenziswa ukuthenga amafutha ezimoto asesilela eMalawi.
Umnu. Rejoice Ngwenya ingcwethi kwezenotho ezimele yodwa uthi ele Zimbabwe kumele lidinge imali yokubhadala isikwelede lesi esiyangisa ilizwe.
