UBulawayo uthi ilanga leKhisimusi lalonyaka lehlukile kakhulu lamanye amakhisimusi adlule ngoba uzulu engelamali njalo lobhubhano lweCovid-19 lwenze kwabanzima ukuba abantu balilungiselele njengemvama.
Isakhamuzi sakoBulawayo uMnu Lovemore Moyo ngomunye wabalombono munye.
“Singajabulela isipho sempilo ngoba abantu behlulekile ukulungiselela ngenxa yecorona leyo abantu baphamabanisekile kakhulu kwabuya lomnotho wethu ongamanga kuhle lonyaka ikhisimusi akula, akulamicimbicimbi okwekhisimusi akukho. Sijabulela impilo amabhoda abantu bavalelwe ngabe abantu abavela phandle babuyile bekuzakuba nganeno. Lezikolo ezizavulwa kunzima ukuthi abantu bathathe imali yonale abalayo ngoba izikolo ziyavulwa kuviki ezayo.”
Olwela amalungelo oluntu, enguMqondisi weHabbakuk Trust, uMnu Dumisani Nkomo uvumelane loMoyo.
“Kunzima kakhulu abantu abanengi abenelisi ukuba lekhisimusi enhle umasiqathanisa lemandulo abantu babesenelisa ukuthi bathenge impahla ezintsha ukudla, baye ekhaya bakholise. Kodwa ngenxa yesimo seCorona lomumo womnotho kunzima kakhulu abantu abanengi abazange bethenge ukudla kumbe balale ngesibomvu ngenxa yomumo womnotho.”
UNkosazana Nombulelo Ndlovu yena uthi eyalonyaka yikhisimusi ngebizo nje.
“Akulamehluko lifana lamalanga wonke lilanga nje esesilijwayele ngoba izinto zijikile abantu behlulekile ukuthi bavakatshe ngezizatho zemali, abanye bathi ukupheka kuyafana ngoba behlulekile ukuyathenga abantu bazihlalele akulalutho oluhle esilubonayo ngalelilanga khathesi.”
Osakhulayo, uLinda Moyo weNkulumane koBulawayo uthi umehluko ngeyalonyaka yikuthi idlalwa kuleCoronavirus.
“Yonke into imnandi kimi ayihlukananga kangako leminye iminyaka ngaphandle kokuba nje kulecorona kufanele sihlale ezindlini sizivikele sihlangana sibalutshwana, Abantu ngibabona bethabile nje.”
Ikhisimusi yalonyaka iyehlukile leminye iminyaka ngenxa yokonakala komumo wezenotho wona obangwe ngamandla langokuqhamuka kobhubhano lweCovid-19 lapho uzulu avinjwe ukuba lemicimbi, ukuvakatshelana kanye lokujabulela lelilanga njengeminyakeni, abantu bekhuthazwa ukuhlala ndawonye ngemakhaya ukuze bengamemethekisi leligcikwane okulandelwe ngabanengi.
Your browser doesn’t support HTML5
Udaba lwemibono kaBulawayo ngeKhisimusi siluphiwa nguAnnahstacia Ndlovu