Umkhokheli webandla leZapu, uMnu. Dumiso Dabengwa uthi uMongameli Robert Mugabe engaba sowakhetha kudala umuntu afuna athathe isikhundla sakhe lapho esesukile kodwa kafuni nje ukuthi kwazakale okwamanje.
UDabenga uthi ngokubona kwakhe lowomuntu akekho phakathi kwalabo abanakanelwayo kumbe omunye wabasekeli bakhe, uMnu. Emmerson Mnangagwa loba uMnu. Phelekezela Mphoko.
Kungxoxo ethinta indaba ezitshiyeneyo eziphathelane lesimo sezombusazwe eZimbabwe, uDabengwa uthi, wathi esezasuka kulelibandla wahle wabona ukuthi inxabano ekhona yayizoqhela.
Ibandla leZapu laxexebuka kumanyano webandla leZanu PF ngomnyaka ka 2004 ngemva kokuba uDabengwa labanye besole indlela lelibandla elalibusa ngayo.
Umuyi uDr Joshua Mqabuko Nkomo owayengumkhokheli webandla leZapu
UDabengwa utshele iStudio Seven ukuthi ibandla le Zapu liyafuna ukusebenzelana lamanye amabandla aphikisayo kodwa uthi kalisoze lafa lavumela ukuginywa ngelinye ibandla njengalokho okwenzakala kusivumelwano sokumanyana kwebandla lakhe leZapu elalikhokhelwa ngumuyi uDr Joshua Mqabuko Nkomo leleZanu likhokhelwa nguye uMugabe kuUnity Accord yomnyaka ka1987.
"Satsho thina kuqalisa ukuxotshwa intombi le eka Mujuru labasekeli bayo satsho sathi hayi lokho kutshengisa ukuthi inhlanganiso yeZanu isizahlephuka ibe yizicucu. Nanku siyakubona kuyenzakala lakathesi sikubukele kuyaxatshwana okuzwayo kubangwa izikhundla, kubangwa ukuthi ozangena ezicathulweni zikaMugabe ngubani," kutsho uDabengwa.
UDabengwa uthi bayaxoxisana labalwa impi yenkululeko abakubandla leZanu PF kukhulunyiswana ngomumo okhona ngoba kuyesatshelwa ukuthi kungaqhubeka kunje kungaphetha konakale.
UDabengwa uthi ibandla lakhe liyavumelana ukusebenzelana lamanye amabandla kodwa abangakufuniyo yikuthi ibandla leli liginywe njengalokhu okwenzkalayo beze bamanyane lebandla le Zanu.
Your browser doesn’t support HTML5
Ingxoxo loMnu. Dumiso Dabengwa