Ugatsha lwebandla leZAPU e-Ngilandi luthi solulolonga amalungiselelo omkhosi wokunanza impilo kamuyi uMnu. Joshua Mqabuko Nkomo owayekhokhela lelibandla njalo engumsekeli kamongameli welizwe, yena owabhubha ngelanga lakuqala lika Nkwenkwezi ngomnyaka ka 1999.
Umkhosi ofanayo oqoqwe yinhlanganiso ye Matabeleland Entertainment News ukhangelelwe ukuqhutshwa eHillbrow Theatre kwele South Africa ngempelaviki ezayo.
Imikhosi yokunanza umuyi, yena owayengumsekeli kamongameli weleZimbabwe uqhutshwe kumaviki ambalwa edluleyo elizweni, ikakhulu koBulawayo nguhulumende, ibandla leZANU PF, kanye lenhlanganiso ezizimeleyo.
Isiphathamandla esibona ngokwethulwa kwembiko kubandla leZAPU eNgilandi uMnu. Thulani Nkala uthi umkhosi lo waqoqwa ngoba abantu sebekhalaze ukuthi bafuna ukuphatheka kuwo.
Your browser doesn’t support HTML5
Ingxoxo LoMnu. Thulani Nkala
Izizalwane zeZimbabwe, ikakhulu kwele Melika leSouth Africa, zivame ukunanza omunye njalo umkhosi owokuhlonipha inkosi yamaNdebele uMzilikazi kaMatshobana, okungumkhosi onanzwa minyaka yonke koBulawayo.