Abanye abalandeli baka Mongameli Donald Trump, olukhu esithi waqilwa kukhetho lukamongameli libandla lama Democrats, sebevuma ukuthi uMnu. Joseph Biden uzangena esikhundleni sikamongameli ngoZibandlela.
Okhokhela idale leSenate, uMnu. Mitch McConnell, ngomunye wabathi uBiden wanqoba uTrump kukhetho olwenziwe ngoLwezi.
Kodwa isikhulumeli sika Trump, uNkosazana Kayleigh McEnany, uthi uTrump lokhu ephikisa impumela yokhetho lolu.
UBiden uthi ngamanga aluhlaza tshoko ukuthi ukhetho lwebiwa libandla lama Democrats.
UTrump usechothoze uMcConnell ngokuvuma kwakhe ukuthi uBiden wanqoba kukhetho luka mongameli. UTrump uthethise uMcConnell enkundleni yokuxhumana eyeTwitter esithi uligwala njalo abantu bazamhlamukela.
Abalandela okwenzakalayo bathi uBiden ukhangelelwe ukungena esikhundleni ngoZibandlela loba kulabanye abakudale leCongress abafuna ukuvimba ukubalwa kwama Electoral Votes mhlaka 6 Zibandlela.
UNkosikazi Priscilla Ndlovu, olandela okwenzakala eMelika, uthi kumqotho okwethulwe nguMcConnell.
UMnu. Khaliphani Pugeni, isikhulumeli sikamongameli webandla leMDC-T, uthi kuyethusa okwenziwa nguTrump.