UMongameli Donald Trump uthi abantu bekwele Melika bathanda uzibuse njalo akulamuntu ongabathathela lokhu.
Wethule lokhu ngoLwesine ntambama phandle kwendawo ebizwa ngokuthi yiLincoln Memorial lapho obekulabantu abanengi, ikakhulu abamhlophe.
“Phakathi kweminyaka engamakhulu amabili lamatshumi amane lantathu okhokho bethu balwela ililzwe leli besenzela ukuthi sibe lozibuse.”
Uthe abantu bakwele Melika balesibindi okumangalisayo. “Ukusebenza gadalala, isibindi, ukuzimisela, ukuthembeka, uthando lokunye okwakha ilizwe leli ukuthi libengeliqine okwedlula amanye amazwe.”
UTrump, obesethula umbiko wakhe abesethatha ikhefu kancane ebukisa indizamtshina zokulwa empini, uthe ilizwe leMelika liqine okumangalisayo okwamanje.
“Ilizwe lethu liqine okwedlula elaliyikho. Liqine okumangalisayo.”
Uphinde wathi konke okwenziwa ngabantu bakwele Melika kutsho ukuthi akula okungehlula abantu elizweni leli.
“Esikudingayo ukuthi sikwenze kwenza ukuthi uThomas Edison enze izibani zomlilo kagetsi, ukuthi uAlexander Graham Bell alungise ucingo lokukhulumisana, amajaha akoWright akhangele emoyeni ezendizamtshina … bantu beMelika akula okungasehlula.”
UTrump uthe ibutho leMelika lilwela wonke umuntu njalo kalikaze linqotshwe empini.
“Njengenhlalayenza, ibutho njengalokhu elakwenza ilizwe lithola uzibuse, inkulululeko yelizwe leMelika isemandleni ebutho elilabobaba labomama abazimisele ukulivikela.”
Ugqibe akwethuleyo ngokuthi ilizwe le Melika lilabantu abazimisele ukwenza abakufisayo okuzalithuthukisa.
Abanye abantu basola okwenziwe nguTrump besithi akumelanga kukhanye engani ibutho ngelakhe. Omunye wabamchothozileyo nguNkosikazi Priscilla Ndlovu, ingcwethi kwezombusazwe, othi uTrump kukhanya uthanda izenzo zabantu abephula ilungelo likazulu abanjengo Mongameli Vlamir Putin wakwele Russia labanye abasebenzisa ibutho engani ngelabo.
Abakubandla lama Democrats bathi uTrump ubezibonakalisa ngesikhathi kulungiselelwa ukhetho oluzayo. Bathi basahlolisisa ukuthi usebenzise imali enganani ekubukiseni ibutho lokunye akwenze ngosuku lokunanza uzibuse.
Your browser doesn’t support HTML5
Udaba Esilethulelwe NguGibbs Dube