Isibhedlela seMpilo sesidinge amasotsha azaphathisa odokotela abakhulu ukwelapha izigulane ngesikhathi amadokotela asethuthukayo ekhalala umsebenzi.
Ukukhalala umsebenzi kwabodokotela sekulenyanga egcweleyo njalo izigulane ezelatshwa zivela phandle kazitholi uncedo.
Umqondisi wesibhedlela seMpilo, uDokotela Solwayo Ngwenya, utshele umsakazo weVOA Studio ukuthi sebecele odokotela abakubutho ukuthi bazobancedisa ngenxa yokuthi isikhathi sesiside odokotela bekhalale umsebenzi.
Uthe kakwazi ukuthi bazathola odokotela abangaki abakubutho.
UNgwenya ugcizelele esithi umumo esibhedlela awumubi kangako ngakho-ke uzulu akumelanga ethuke ngoba kulabodokotela abangavunyelwa ukukhalala umsebenzi.
Amadokotela lokhe eqhubekela phambili ngokukhalala umsebenzi esithi kawasoze abuyele emsebenzini nxa izikhalazo zabo zingalungiswanga
Bathi ezikhathini ezedluleyo sebeqilwe kakhulu ngokuthenjiswa izinto ezingafezekanga.
Isikhulumi sabodokotela abangaphansi kwenhlanganiso yeZimbabwe Hospitals Doctors Association, uDokotela Mxolisi Ngwenya, uthi ukuthathwa kwebutho lisetshenziswa ezibhedlela akulamehluko okuwudalayo ngenxa yokuthi inani lamadokotela ebutho lilutshwana kakhulu njalo alisoze lenelise ukubona izigulane zonke elizweni.
Olwela amalungelo oluntu, uMnu. Mike Ndiweni, uthi ukusetshenziswa kwamadokotela asanda kuqeda izifundo lakho akusoze kulungise uhlupho olubhekane labo dokotela ezibhedlela zikahulumende.
Isakhamuzi sakoBulawayo esixoxe leStudio 7, uNkosikazi Sichelesile Mahlangu, uthi ukuthathwa kwebutho lamadokotela asuka emakolitshini kubi ngenxa yokuthi uhulumende ubalekela ukulungisisa izikhalazo zabodokotela abalolwazi lokwelapha.
Eminyakeni eminye lapho odokotela nxa bekhalele umsebenzi uhulumende ujwayele ukusebenzisa amadokotela ebutho.
Inhlanganiso yamadokotela eyeZHDA isanda kwethula umbiko oveza ukuthi bathakazelela ukuthi uMongameli Emmerson Mnangagwa usezwile izikhalazo zabo wathembisa ukuthi zizakhangelwa.
Your browser doesn’t support HTML5
Udaba Esilethulelwe NguBathule Masuku