Odokotela abalesikhathi eside besebenza ezibhedlela zikahulumende bathi kabasenelisi ukuya emsebenzini ngenxa yeholo eliphansi njalo lokuswelakala kwemithi lokunye okufunakala ezibhedlela.
Abantu abasesibhedlela sikahulumende abadinga uncedo.
Bethule lokhu namuhla encwadini ejulilejo abayibhalele uhlangothi lukahulumende olwezempilakahle.
Bathi iholo labo liphansi okokuthi abasenelisi ukuziphilisa njalo lokuya emsebenzini. Bathi udokotela okusigaba sabo uhola amakhulu amahlanu – 500 Zimbabwe RTGS dollars - kuthi-ke abanye ababizwa ngokuthi ngama consultants bathola okwedlula kancane inkulungwane zamadola – 1,010 Zimbabwe RTGS dollars – ngenyanga.
Odokotela laba bathi abanye babo abasebenza kwele South Africa bahola phose inkulungwane ezingamatshumi lasithiyangalombili – 80,000 Rands – kusiyaphezulu ngenyanga. Baphinde bathi bahlutshwa yikusilela kwemithi lokunye ofumele bakusebenzise ezibhedlela.
Umgcinisihlalo wohlangothi lweHealth Service Board, uDokotela Paulinus Sikosana, lezinye iziphathamandla zohlangothi lolu.
Abakhulume lomsakazo weStudio 7 bathi sebeyehlulekile ukuvumelana lomqhatshi ngeholo lokunye abakufunayo ngakho-ke bazakhalala umsebenzi ngoLwesine.
Okwamanje odokotela abasakhulayo bakhalala umsebenzi ngokufanayo. Ukuze sizwe okunengi ngodaba lolu, sixoxe loDokotela Paulinus Sikosana, umgcinisihlalo weHealth Service Board, eqhatsha odokotela. UDokotela Sikosana ucele ukuthi odokotela bengakhalali umsebenzi.
Kodwa odokotela laba bathi bazaqhubelela phambili ngokukhalala umsebenzi.
Your browser doesn’t support HTML5
Ingxoxo Esiyenze LoDokotela Paulinus Sikosana