Dokotela Peter Magombeyi, okwakhuthiwa uthunjwe ngabantu abadlelala lohulumedne kaMongameli Emmerson Mnangagwa wavumbuluka sokudlule insukwana eNyabira duzane leHarare, kubikwa ukuthi lokhu eseAvenues Clinic.
UDokotela Samson Dean Ndoro, umsekeli kamongameli wenhlanganiso yabodokotela eyeZimbabwe Hospital Doctors’ Association, uthi uDokotela Magombeyi kakho kusimo sokuthi sengakhitshwa esibhedlela.
Uthi bamelele ukuzwa kubodokotela abamhlolayo ukuthi batholani egazini lakhe. Okwamanje, uthi kababuyeli emsebenzini bengakatholi impumela yenhlolisiso le njalo uhulumende engakakhuphuli iholo labo.
UDokotela Samson Dean Ndoro ngumsekeli kamongameli wenhlanganiso yeZimbabwe Hospital Doctors’ Association.
“Kakafiki kusimo sokuthi asuke esibhedlela. Simelele ukuzwa ukuthi kwatholakalani egazini lakhe. Asikwazi lokhu njalo okukhulunywa ngabantu abathi usesebenzisa iwheerchair. Uyakhuluma. Uyahleka. Simelele ukubona impumela yenhlolisiso yomzimba wakhe eyenziwa ngodokotela. Ngizalethulela okunengi singathola impumela yenholisiso eyenziwe ngodokotela engaphuma ngokutshetsha.”
Uthi bazabuyela emsebenzini sebehlolisise okwehlele omunye wabo njalo uhulumende esekhuphule iholo labo.
“Asikatholi umbiko wokuthi kwenzakalani kudokotela. Yikho okusenza singabuyeli emsebenzini njalo leholo eliphansi. Kuzwisa ubuhlungu okwenzakala kuzigulane kodwa udokotela ongaholi kahle angeke aphathe kahle izigulane.”
Your browser doesn’t support HTML5
Ingxoxo Esiyenze LoDokotela Samson Ndoro
Ababona ngokwenzekalayo bathi kuthatha isikhatshana ukuthi kuhlolisiswe igazi lomuntu, ikakhulu nxa kudingwa okunjenge tshefu.
UDokotela Elophi Sibanda, ingcwethi kwezempilakahle ezimele yodwa, uthi ukuhlolwa kwegazi okwenziwa kuDototela Magombeyi kunjengokunye okwenziwa kwele South Africa hatshi eZimbabwe.
Your browser doesn’t support HTML5
Ingxoxo Esiyenze LoDokotela Elophi Sibanda
Kasenelisanga ukukhuluma lomphathintambo kahulumende obona ngezempilakahle, uMnu. Obadiah Moyo, obengaphenduli umakhalekhukhwini wakhe.