Ikhomithi yedale lephalamende ebona ngokulotshwa kwesisekelo sombuso esitsha eye COPAC ithi yehlulekile ukuvumelana ngodaba lokuzibusa kwezabelo, i-Devolution kodwa yavumelana ukuthi iphalamende kube yiyo ezabumba umthetho wokuthi abantu bengaba leDual Citizenship kumbe hatshi.
Ikhomithi le ithi izakuba lomunye umhlangano ngolweSithathu lapho ezacubungula konke okuphathelane lodaba lokulotshwa kutsha kwesisekelo sombuso.
UMnu. Alois Dzvairo, umgcinisihlalo wabatsha kunhlanganiso yeNational Constitutional Assembly utshele uSithandekile Mhlanga we Studio 7 ukuthi akufanelanga ukuthi amabandla ezombusazwe kube yiwo aphikisana ngokumunyathwa yisisekelo sombuso esitsha.
UMnu. Dumisani Nkomo, ingcwethi ecubungula ezombusazwe, ugcizelele amazwi kaMnu. Dzvairo, wengezelela ukuthi inengi labantu eMatabeleland leMidlands lilakho ukwala ukwamukela ugwalo lweDraft Constitution nxa udaba lweDevolution lungavunyelwananga.