Amagqwetha entathelizindaba uHopewell Chin’gono olokhe evalelwe eChikurubi, eseyalelwe kathathu konke ukuhlawulela isibambiso seBail, ukuze athoniswe evela emzini wakhe, aveza ukuba akezwa kuhle ngakhoke udinga usizo lokwelatshwa esibhedlela ngesiphangiphangi njalo eseyazisiwe udokotela wakhe.
Elinye lamagqwetha kaChin’ono umnumzana Doug Coltart ulobe enkundleni yokuxhumana eyeTwitter ukuthi umethekelele eChikurubi, ngemva kokuba enze isicelo sesiphangiphangi ukuthi ufuna ukubonana lamagqwetha akhe.
U Coltart ufakaza ukuba ngempela akezwa kuhle uChin’ono njalo besalindele ukucetshiswa ngudokotela wakhe ukuthi kuthathwe manyathelo bani.
Ingcwethi kwezombusazwe umnumzana Mlindelwa Mancitshana uthi kulusizi okwenzakala kuHopewell Ching’ono labanye abagoqela umkhokheli weTransform Zimbabwe onguye njalo umgcinisihlalo we 31st JULY MOVEMENT umnumzana Jacob Ngarivhume labanye abalokhe beyalelwa izicelo zokuhlawulela isibambiso seBail.
“Lokhu kutshengisa ukuncindezela kakhulu ukuthi nxa abadala laba lingavumelani kumbe ukhulume lokho okungahambelani labo, bazakuhlukumeza. Kwenziwe konke abakufunayo, ububi bonke benzeke lokhe uphakathi. Okuyisigaba esibi esenzakalayo khathesi eZimbabwe ukubona ukuthi amalungelo abantu aphethwe kubi. Njalo kuyindlela yokwethusela, ngulowo lalowo ozafuna ukuphikisa uhulumende, ukuthi ubone ukuthi nxa usuphakathi ngale, noma yini izakwehlela njalo ukuthi uthole usizo kuzakuba nzima kakhulu ".
U-Chin’ono, uNgarivhume lomsekeli womgcinisihlalo weMDC Alliance, uMnu. Job Sikhala betheswa nguhulumende umlandu wokutshotshozela uzulu ukuba atshengisele ngodlakela kuhlelo olwaluqoqwe ukwenzia mhla ka 31 Ntulikazi ngenjongo yokufuna ukugenqula umbuso kaMongameli Emmerson Mnangagwa.
Umqondisi wenhlanganiso yezokholo eye Zimbabwe Devine Destiny uBishop Ancelimo Magaya uthi okukhulunya ngombuso okhona akusilo cala ngoba kukhona lasembhalweni ukuthi ababusayo batshelwe ngamaphutha abo.
“Lokhu ngiyakutsho yiloba ngingaphi njalo kungelani ukuthi ngiphambi kukabani, ukuthi uNkulunkulu nguye oguqula imibuso. Ke likhangele uMbhalo kugwalo lukaDaniel, u Daniel isahluko sesibili kuverse 21, uyatsho ukuba uNkulunkulu uyawasusa amakhosi ezikhundleni zabo lapho sesifikile isikhathi sokuba basuswe enguye njalo obabeka kulezo zikhundla, uyayiguqula imibuso, angithi. Singaze savuma ukwethuselwa ke ngalendaba yokususwa lokubekwa kwemibuso, luhlelo lukaNkulunkulu lolo, ukubona ukuthi amakhosi ayabekwa ezikhundleni ngezikhathi ezifaneleyo aphinde asuswe njalo. ”
Ukhangelelwe ukuphindela emthethwandaba ngoLweSithathu uChin’ono ukuze kuhlaziywe udaba lwesikhalazo sakhe sokuthi aphiwe imvumo yokuhlawulela isibambiso sebail.
Kolunye udaba obemela iKuwadzana East ,edale lephalamende osewaxotshwayo, umnumzana Charlton Hwende, oweMDC Alliance utshelwe ukuba abuyisele incwadi yakhe yokuhambisa yohlobo lwe Diplomatic Passport aphiwe leyo ayelayo esetshenziswa ngumuntu wonke.
Encwadini elotshelwe uHwende ngumabhalane omkhulu wedale lephalamende umnumzana Kennedy Chokuda uthi lokhu kwenziwa ngesizatho sokuba engaselilunga ledale njengoba waxotshwa phansi kweziqondiso zomkhokheli we MDC T, uNkosazana Thokozani Khuphe.
Kodwa ingcwethi kwezombusazwe ezigoqela umnumzana Mlindelwa Mancitshana bayalisola lelinyathelo eselithathwa yidale lephalamende.
“Bayazama ukusebenzisa loba yini abayibonayo ukuzama ukungqanda ukuthi amanye ama MP lawa angani asasalele, bethuke ngalokho osekusenzakala ukuthi ah, nxa ngingala lokho ukungafuni ukuya kuMaKhuphe lami ngizahlaselwa ngendlela enje kumbe ngicine ngithathelwe iPassport lami njengokusekwenziwe uHwende. So singathi yindlela nje eyokuzama ukwethusela abanye laba abangakacabangisisi kahle ukuthi sekuyisikhathi sokuya kuMaKhuphe. Abanengi khathesi sebephitshekene, sebebona ukuthi ah, kutsho ukuthi khathesi njengoba impilo yethu ibihamba ngale indlela, sizathathelwa izinto ezinengi, kungangcono nje siziyele khona koMaKhuphe. Okuyinto elihlazo nxa sikhangele amalungelo abantu ukuthi umuntu kumele azikhethele akufunayo, ayenze okuyikho akubona kuqondile ngesikhathi lezo. ”
Okusekelwe ngesinye isakhamuzi seHarare umnumzana Collins Ncube.
“Engizibuza khona yikuthi kungaba kuyinto esemqoka khathesi nxa sikhangela i business ye Parliament?. Akula nkinga ukuthi bebathe balethe amaDiplomatic Passports kodwa yindaba abayiphikisayo phela labo, emthethwandaba. Kuthi kungathi kuyisikhathi seLockdown kukunje amaBorder lawo evaliwe kube kubhizi abantu bethathelwa amaDiplomatic Passports. Angiboni ukuthi yindaba engaba semqoka sikhangelane lomumo esikuwo, kweleZimbabwe. ”
Encwadini yakhe uChokuda, ayilobele uHwende phezu kwaloludaba, ukubeke sobala ukuba lelinyathelo lithathwa nje kulandelwa okwavunyelanwayo ngoMpandula nyakenye lapho umongameli Emmerson Mnangagwa athi kumele amalunga edale lephalamende batholiswe ama Diplomatic Passports azosetsheniswa kuphela ngesikhathi bengamalunga alelodale.
Your browser doesn’t support HTML5
Udaba Esilethulwe NguMavis Gama