Uhulumende weZimbabwe uthi iziphala zelizwe ezilondolozwa luhlangothi lweGrain Marketing Board (GMB) sezisele lokudla okulutshwana kakhulu kanti lesivuno salonyaka laso asisoze sifike lakusigidi esisodwa sama-tonne.
Uphenyo olwenziwe lugatsha olubona ngezokulima luthi kusivuno salonyaka ilizwe lizathola ama-tonne edlula kancane inkulungwane ezingamakhulu ayisitshiyangalombili, 868,000 tonnes omumbu, amabele kanye lengqoloyo.
Kodwa eleZimbabwe ngomnyaka lidinga ama-tonne ayizigidi ezimbili, 2.2 million metric tonnes awokudla kwabantu lezifuyo.
Abantu bodwa badinga ama-tonne ayizigidi citshe ezimbili, 1,8 million metric tonnes, ngomnyaka kuthi izifuyo zona zidinga inkulungwane ezingamakhulu amane, 400,000 metric tonnes.
Okwamanje eziphaleni zeGMB kulomumbu ongena ku-145,000 metric tonnes kuphela; amabele ayi-43,000 metric tones kuthi ingqoloyi yona iku-244,000 tonnes, kutsho uphenyo lukahulumende.
Luthi njalo isigaba seMidlands yiso esizathola isivuno esiphezulu ukwedlula ezinye indawo zelizwe kuthi iMatabeleland South yiyo ezathola esiphansi kakhulu.
Inhlanganiso eziphathisa abalambayo zithi abantu abadinga usizo lokuhla oluphuthumayo eZimbabwe sikhuluma-nje baphakathi kwezigidi phose ezintathu, 2.7 million kusiya kuzigidi ezintathu ezilengxenye, 3.5 milion.
Sixoxe losomabhizimusi olenkampani ethengisa impuphu uMnu Abednico Bhebhe, njalo owake waba ngummeli wesigaba seNkayi edale lePhalamende, yena othi uhulumende ukhanya engazilungiselelanga ukulwisana lendlala le ngaphandle kwenhlelo zenhlanganiso ezizimeleyo ezifana leyeWFP.
Your browser doesn’t support HTML5
Ingxoxo loMnu Abednico Bhebhe
Kodwa uMongameli Emmerson Mnangagwa uthi uhulumende uphakathi kokukhusela bonke abalambayo futhi uthi akulamuntu ozabulawa yindlala lonyaka.