Ikhansili ebona ngezamasiko lokubekwa kanye lokususwa kwezinduna eyeNational Chiefs Council, ikhangelelwe ukuthi izakwethula isinqumo sobuduna benduna uFelix Nhlanhlayamangwe Ndiweni kunsukwana ezilandelayo.
Induna uMtshana Khumalo, okukhansili le, utshele umsakazo weStudio 7 ukuthi benza konke lokhu belandela okufiswa ngumdeni wakoNdiweni njalo okusemthethweni.
Your browser doesn’t support HTML5
Chief Mtshana Khumalo: Sokuzakwethulwa Isinqumo Sodaba Lwenduna uNdiweni
Induna ezikunhlanganiso yeMatabeleland North Provincial Chiefs’ Assembly zisanda kuthatha isinqumo sokuthi ubuduna buka Ndiweni abukho emthethweni ngakho-ke kumele asuswe esikhundleni.
Kodwa abanye abomdeni wako Ndiweni bayakwala lokhu besithi ufelix Nhlanhlayamangwe Ndiweni wagcotshwa nguyise umuyi uKhayisa Ndiweni lobanje izibulo lakhe, uJoram Ndiweni, elokhu ephila.
UDouglas Ndiweni, icinathunjwana likaKhayisa Ndiweni, uthi uJoram Ndiweni nguye okumele abeyinduna hatshi umnewabo uFelix Nhlanhlayamangwe Ndiweni.
Asenelisanga ukukhuluma lenduna uFelix Nhlanhlayamangwe Ndiweni okubikwa ukuthi usephanyeke udaba lolu emthethwandaba.
Ingcwethi kwezamasiko, uMnu. Mqondobanzi Magonya uthi induna uFelix Nhlanhlayamangwe Ndiweni kayindawo.
Your browser doesn’t support HTML5
Mqondobanzi Magonya: UFelix Nhlanhlayamangwe Ndiweni Kayindawo