Inhlanganiso yeConfederation of Zimbabwe Industries (CZI) ithi amankampani aqhubeka evala ngobunengi njalo lezisebenzi zilahlekelwa yimisebenzi ngenxa yokubhidlika komnotho.
Inhlanganiso le ithi amankamani alokhu esebenza, abhekane lobunzima obukhulu bokuswela imali yokubhadala izisebenzi kanye lokuthenga indingeko zawo.
Edolobheni lakoBulawayo khona iphephandaba lebulenjini eleThe Source libike ukuthi kulamankampani alitshumi avalileyo phakathi kukaZibandlela loNhlangula.
Umumo ubikwa uqhubeka usiba mubi emadolobheni amanengi elizwe agoqela eleMutare, osokubangele ukuthi izisebenzi ezinengi zilahlekelwe yimisebenzi.
Umphathintambo obona ngezamankampani uMnu Mike Bimha ukweleChina okwamanje ukuyadinga usizo lokuvuselela umnotho kuhulumende walelo lizwe.
Isiphathamandla senhlanganiso emela izisebenzi iZimbabwe Congress of Trade Unions (ZCTU) uMnu Japhet Moyo uthi uhulumende kumele alungisise umnotho ngokuphangisa.
Amazwi kaMoyo agcizelelwe yingcwethi kwezenotho uMnu Masimba Kuchera yena othe uhulumende kumele ethule imithetho ezahuga osomabhizimusi bakwamanye amazwe ukuthi baze eZimbabwe.