Abakumsebenzi wezempilakahle eZimbabwe, abagoqela odokotela, bahlangane labanye babo abavele kwele Bhilithani ngoLwesine behlaziya inhlupho eziphathelane lomkhuhlane wemvukuzane yebele elizweni.
Okuvele sobala yikuthi abantu abanengi beza ukuzodinga usizo lokwelatshwa umkhuhlane usunzima ukulwisana lawo.
Emhlanganweni lo owenzelwe esibhedlela seUnited Bulawayo Hospital koBulawayo, kuvunyelenwe ukuqinisa inhlelo zokulimukisa abantu ngalumkhuhlane.
Obekhokhela iqula elivelela eBritain, uMnu. Richard Ronnsbury ongumgcinisihlalo weInternational Forum Association Breast Surgery, uthe bakhangelele ukufundisa kabanzi abezempilakahle bakuleli ukunanzelela imvukuzane yebele kusese masinya.
“Sihlangane lengcitshi zempilakahle, omongikazi, odokotela abakhangela ngemvukuzane yebele.Ukuze sizwisise ukuthi kungani omama bakuleli besiza ukuzohlolwa isikhathi sesihambile.Sizathanda ukufundisa abempilakahle abakoBulawayo leZimbabwe yonke jikelele ukungezeleleni imfundo yokunanzelela masinya umkhuhlane lo.Labo bazabuya bafundise abanye ngapha, njalo iUBH izakhokhela lokhu.”
UDokotela Chrispen Ntodo, osebenzela esibhedlela seMpilo Hospital, uthe uhlupho olukhulu yikuba abantu bayaphuza ukuzodinga usizo lokwelatshwa.
“Silokuphuza okunengi okuvelela ekubuyeni kwezigulane ukuthi zelatshwe. Ngakho kumhlangano lo sikhangelele ukubona ukuthi singenza njani ukuze sivikele lokhu. Sinanzelele ukuthi eyinye yezizatho zokuthi abantu baphuze ukuza esibhedlela yikuba bacabanga ukuthi bazakhitshwa ibele kodwa ke imvukuzane yebele iyelapheka nxa ungaza masinyane. Sikholwa ukuba abantu balolwazi olungayisilo kungakho ke beqala enyangeni bethi sebebuya esibhedlela isikhathi sesingekho.”
Omunye wabongi uNkosikazi Nobuhle Ncube uthe omama balakho ukuzihlola ngasemakhaya, ukuze bathole usizo umkhuhlane ungakabi lolaka.
Your browser doesn’t support HTML5
Udaba lomhlangano ophathelane lemvukuzane yebele siluphiwa nguBathabile Masuku