Ezinye izikolo zePrimary koBulawayo zibikwa zisala ukupha abantwana abasanda qeda izifundo zikaGrade 7 ama-results abo ngoba belezikwelede.
Lokhu sokubangele ukuthi abanye abafundi behluleke ukuya kuForm 1 ngoba kudingeka ama-results abo ukuze bathole indawo.
Omunye wabazali abathukutheleyo ngaloludaba nguNkosikazi Fikile Gumede yena olomntwana obanjelwe amaresults eNtabeni Primary School koBulawayo.
“Umntamani ubesenza uGrade 7 kodwa kasayanga kuForm 1 ngoba bamncitshile amaresults akhe besithi kumele ngiqale ngibhadale imali. Kodwa angilayo leyomali,” kutsho uNkosikazi Gumede.
Omunye njalo umzali uNkosikazi Thoko Nyathi uthi lowakhe umntwana uncitshiwe amaresults eCoghlan Primary School ngoba elesikwelede.
“Ukuze ayengena esikolo seSecondary umntanami kuyabe sokufuna ukuthi ngibhadale isikwelede,” kutsho uMaNyathi.
Umbalisi ofundisa kwesinye isikolo okhethe ukuzibiza ngoMiriam Siwela uxwayise abazali ukuthi babhadale izikwelede zabantwana ukuze bathole amaresults abo.
Uthe abafundi bebevunyelwa ukufunda bengabhadalanga ngenxa yokuthi uhulumende kavumeli ukuthi abafundi baxotshwe ezikolo kodwa ngenxa yokuthi sebephuma kulezo zikolo kumele bahlawule izikwelede zabo.
Imizamo yokukhulimisana leziphathamandla zogatsha lukahulumende olubona ngezemfundo yehlule.
Your browser doesn’t support HTML5
Udaba Siluphiwa nguBathabile Masuku