Kuyaxokozela eZimbabwe ngohlelo lokuhlolisisa umbhuqazwe weGukurahundi oluzaqhutshwa zinduna eMatabeleland.
Abaphikisayo bathi akumelanda uhlelo lolu luphathwe zinduna kodwa amalunga ebandla leZanu PF athi luzaqhutshwa ngemfanelo zinduna.
UMnu. Nhlanhla Moses Ncube, unobhala jikelele weFreedom Alliance, uthi kuyamangalisa okwenziwa nguhulumende ofuna induna zikhokhele uhlelo lolu loba lazo zazithwele amagabha avuzayo kusukela ngomnyaka ka1982 kusiyafika umnyaka ka1987 ibandla lePF Zapu leZanu PF ebumba umanyano.
UNcube uthi kulusizi ukuba abantu ababulawelwa izihlobo labangane sebebanjwa ngamandla ukuba bekhulume lezinduna hatshi lenhlanganiso ezizimeleyo.
Kodwa uMnu. Joseph Tshuma owebandla leZanu PF uthi kulungile okwenziwa nguhulumende othi uhlelo lolu kumele lukhokhelwe zinduna.
UTshuma uthi induna yizo ezihlonitshwa ngabantu ngakho-ke zizakwanza umsebenzi ohloniphekayo.
Uhulumende esakhokhelwa ngumuyi uRobert Mugabe wake wacale igqwetha uMnu. Simplicious Chihambakwe ukuba ahlolisise umbhuqazwe lo. Okwaphuma lapho akuzange kuvezelwe uzulu.
IGukurahundi eyalolongwa libutho lakwele North Korea yabulala abantu abafika inkulungwane ezingamatshumi amabili eMatabeleland leNkabazwe ababesekela ibandla lePF Zapu elalikhokhelwa ngalesosikhathi ngumuyi uJoshua Mqabuko Nkomo.
SEE ALSO:
Ingxoxo Esiyenze LoMnu. Nhlanhla Moses Ncube loMnu. Joseph Tshuma