Ngesikhathi imikhankaso yokhetho lukaMongameli weMelika iqhubeka, abebandla lamaRepublicans sebememethekise imbiko yamanga yokuthi izizalwane zaseHaiti ezihlala eSpringfield, esabelweni seOhio zidla omangoye lezinja zabahlali bakulindawo.
Amapholisa eOhio asetshona ebhoda ngezindlu zokufundela ezikolo eqaphe isimo ngemva kwezehlakalo zokwethuselwa kwabantu phezu kwaloludaba.
Abavela eHaiti bathi limbiko isifake impilo zabo engozini enkulu njalo bazizwa bengavikelekanga.
Umfundisi wakulindawo uMnu Bernardette Dor uthe, “Asikujwayelanga ukuthi abantu baseHaiti abahlala eMelika bahlaselwe ngalindlela beqanjelwa amanga.”
Imbiko yamanga le isabalale enkundleni zokuxhumana kanye lasezinkulumeni zokukhankasela ukhetho ivela kuMnu Donald Trump lomsekeli wakhe uMnu JD Vance onguSenator weOhio.
"Ngiyathembisa lokhu, sizabadudula ngobunengi abantu bokuza eSpringfield. Sizabadudula ngobunengi. Sizabaxotsha abantu laba,” kutsho uMnu Trump.
Lanxa iziphathamandla zikahulumende wesabelo lesi lezikahulumende wezwelonke zikuphika kulabantu abadla omangoye lezinja zabanikazi uMnu Vance utshele umsakazo weNBC ukuthi lokhu ukuzwe ngabahlali.
UVance uthe, “Ayisimi engizibazele limbiko. Ngiyatsho ngoba abantu abahlala esabelweni sami bangitshelile ukuthi ngempela kuyenzakala.”
Izizalwane zakweleHaiti ezedlula inkulungwane ezilitshumi lanhlanu, 15,000, zabuya ngokusemthethweni eSpringfied, okulidolobho labantu abazinkulungwane ezingamatshumi ayisithupha, 60,000, zilanda imisebenzi lempilo engcono ngoba intengo yezinto iphansi.
Omunye wabavela eHaiti uClio Paraison uthi usehlalela evalweni.
“Ngabona ku-internet kukhulunywa ngokuthi abantu abavela eHaiti benza imisebenzi engalunganga. Kodwa kungamanga lokhu. Sengisesaba lokungena edolobheni,” kutshi uParaison.
Oncintisana loTrump kukhetho, uKamala Harris, uthi kulihlazo elikhulu ukuqanjelwa amanga kwabantu baseHaiti okwenzakalayo eSpringfield.
"Zinengi indingeko zomvikela ezisetshenziswa ukuvikela abantu abazisebenzalayo, abaziphilela kuhle, asebesethuselwa ngenxa yembiko yamanga," kutsho uHarris.
UMeya weSpringfield uMnu Rob Rue uthi abezombusazwe ababangele ukuthi idolobho lakhe likhangelwe ngelihlo elibi kumele babambe iqhaza ekubhuleni umlilo.
Uthe, “Sifuna abezombusazwe abasezingeni eliphezulu bakhulume amazwi akhayo njalo aleqiniso, amazwi azasilethela ukuthula. Yikho esikucelayo njengabantu beSpringfield. Sifuna ukuthula."
UTrump loVance bathi bahlose ukwethekelela eSpringfield ukuze bayezibonela ngawabo okwenzakalayo.
Your browser doesn’t support HTML5
Udaba Silwethulelwa nguNtungamili Nkomo