Abakade beqoqe ukutshengisela besola idili eliqoqwe ukuthakazelela ilanga lokuzalwa kukamongameli Robert Mugabe edolobheni leMasvingo ngoMgqibelo bathi besabile ukwenza lokhu kulandela abathi yikwethuselwa ngabantu abangabaziyo.
Kunjalo nje uMugabe ubehlala njalo nje enconywa kuzwekazi leAfrica njengomkhokheli oyenelisa ukumelana lombuso wabamhlophe. Ngakolunye uhlangothi, ubonakala njengomncidezeli obubhidlize umnotho weZimbabwe njalo owadlalisa ixetsha lokuba liqhawe.
Lawo ngamazwi kaMongameli Robert Mugabe othandwa ngabanengi kuzwekazi leAfrica.
Umongameli Mugabe uhlonitshwa njengendoda emadodeni, eyenelisa ukumelana lamazwe angentshonalanga wona ayaziwayo kakhulu ngamandla kwezombusazwe kanye lezenotho.
Umongameli Mugabe wayeyintandokazi yamazwe afana leBhilithani ngesikhathi iZimbabwe ithatha uzibuse kodwa ngokuya kwesikhathi kulandela ukwaba komhlabathi okulodlakela njalo okwakhipha amakhiwa emapulazini, ubudlelwano baqala ukuba munyu.
Lokhu, njengoba umnunzana Danisa Ndiweni esitsho, yikho okwasungula inzondano phakathi kukaMugabe lamazwe angentshonalanga, kukanti kwaqala ukumtholela abalandeli kwabanye eAfrica…
Kodwa phakathi eZimbabwe umongameli Mugabe uzenzele ibizo njengomkhokheli onguntando kayiphikiswa…
UNdiweni uthi umongameli Mugabe usukile ukuba liqhawe emehlweni abamhlophe kanye lezinye izizalwane zeZimbabwe ngendaba zodlakela, ukuwa kumumo womnotho lokungahlaliseki nje kwezombusazwe…
Noma nje eqhubeke elabangani kwabanye omangameli eAfrica ikakhulu ababekuhlanganiso yeFrontline States kumbe kumabandla aletha inkulukeko emazweni abo, bekusiba mgceke ukuthi omangameli abatsha abahambelani laye….
Lo kwakungumbono kamongameli Ian Khama weBotswana ngemva kokhetho luka 2013 olwasolwa linengi. EleBotswana yilo lodwa elaphumiselayo lisola okwenzakalayo, okungejwalekanga ngentaba ayikhonjwa engumongameli Mugabe.
Lokhu, ngokubona kukamnunzana Brown Maphisa, kuyisitshengiselo sokuba umongameli Mugabe ubesefike esimeni sokulahlekelwa yinhlonipho ikakhulu kuhlobo olutsha lwenkokheli eAfrica…
Umongameli Mugabe wakhethwa ukumela ibandla lakhe ele Zanu PF kukhetho lokudinga umongameli oluka 2018 lapho azabe esenelise iminyaka engamatshumi ayithoba munwe munye lane, 94.
Your browser doesn’t support HTML5
Udaba Silethulelwa NguMartin Ngwenya