AbeZimbabwe abasebenza ezindlini kanye lemapulazini balakho ukuhola P4,000 ngenyanga kulandela isinqumo sikahulumende omutsha sokuthi kubelomthetho okhomba ukuthi umuntu ohola imali encane uthola malini.
Ibandla elitsha elibusayo eleUmbrella for Democratic Change (UDC) lakhankasa kakhulu ngesithembiso sokuthi ngaphansi kohulumende wabo, ozabe ethola iholo eliphansi ulakho ukuhola inkulungwane ezine zama Pula (P4,000), imali engangamadola eMelika angamakhulu amathathu - US$300.
Lokhu kuzagoqela ukukhuphula iholo labasebenza ezindlini kanye lemapulazini inengi lingabantu abavela eZimbabwe. Inengi labo lithola iholo eliphansi kwama pula ayinkulungwane - P1,000 ngenyanga.
AbeZimbabwe abanengi bakhala ngokuthi imali abayitholayo iphansi ngoba abaqhatshi kabakhangeli isimo somnotho esibi eZimbabwe kukanti inengi liphila kweleBotswana lingelamfanelo yamaphepha aqondileyo. Kodwa uhulumende omutsha ukhangelele ukuntshintsha lokhu, uMongameli Duma Boko esithi uzimisele ukunikeza abeZimbabwe amaphepha okuhlala kweleBotswana.
UNkosazana Sibongile Ncube osebenza eGaborone uthi ngumbono omuhle wokuthi uhulumende akhuphule iholo ngoba okwamanje bahola imali ephansi kakhulu.
"Kungumbono omuhle ukuthi sikhwezelwe iholo ngoba imali esiziholayo zincane, asisuthiseki ngazo. Kuthi ngathi lokhu kuyaqiniswa mhlawumbe lathi sizakwazi esikusebenzelayo."
UMnunzana Oscar Maphosa osebenza ukulungisa impompi lokunye okutshiyeneyo ezindlini, - uplumber - uthi inengi kalisoke lenelise ukubhadala iholo le minimum wage.
"Umuntu endlini uyabe ehola ama P1,500, abanye bevele besehluleka ukubabhadala imali le. Kutsho ukuthi iP4,000 abangeke bayibhadale ngoba kuzatsho ukuthi kumele ube uhola imali ephezulu kakhulu."
UNkosazana Sindiso Sibanda uthi ubona engathi abantu bekhaya, ngenxa yokuthi bathathelwa phansi ngabaqhatshi, abasoke bethole iholo eliyabe lifakwe nguhulumende.
“AbeBotswana bazalithola sibili iholo leli kodwa ngibona abokuza abasoke bayithole le mali ngoba bethathwa njenge cheap labour. Angiboni bezathola yonke iP4,000 ngenxa yokuncindezela.”
Umbiko kaBoko wokuthi abantu bazaphiwa amaphepha ubonwa njengenyathelO elingaphathisa ukuthi abokuza bengancindezelwa ngaphansi komthetho omutsha owe minimum wage.
UMnunzana Mkhululi Moyo ohlala eGaborone uthi balembuzo ukuthi bona njengabokuza bazayithola yini iholo leli.
“Kungumbuzo ikakhulu kithi abakithi ukuthi sizayithola leyo mali kumbe kuyacina kuloncidenzelo. Asazi, kusase ngumbuzo.”
Amanye amankampani afana lelamavinkili eleChoppies, selibike ukuthi lizasungula ukuholisa isisebenzi esihola imali ephansi, iP4,000, kuyikusekela iziqondiso zikahulumende omutsha. Kodwa uMoyo uthi abaqhatshi babo abakakubeki ukuthi bona bathini ngaloludaba, kungakathembisi kibo ukuthi bazalithola iholo leli kumbe hatshi.
“Angikezwa abaqhatshi bekhuluma. Kukhulunywa ngabanye abantu kodwa abaqhatshi bethu abakayithinti leyi ndaba yeholo.”
UMnumzana Pius Mokgware umphathintambo obona ngendaba eziphathelene lezisebenzi uthi imzamo kahulumende yakhe ngeyokubona ukuthi akusaleleli muntu emuva ekutholeni iholo elifaka umuntu isithunzi.
Ihofisi yommeli weZimbabwe kweleBotswana ithi kuqakathekile ukuthi abeZimbabwe bathole amaphepha aqondileyo ukuze bengancidezelwa ngabaqhatshi, njalo bayenelise ukufinyelela uncedo kungatsha zikahulumende ezitshiyeneyo.
SEE ALSO:
Udaba Esilwethulelwe NguMqondisi Dube