Abasekeli beMDC-T abalitshumi lasikhombisa ababotshwe ngeSonto eHarare, abagoqela ummeli weHarare East edale lephalamende uMnu Eric Murai, bakhululwe ngoLwesithathu ngemva kokuvunyelwa ngumantshi ukuhlawula imali yesibambiso efika amadollar angamakhulu amabili-$200 ngamuntu.
Abantu laba betheswa icala lokubangela udlakela emhlanganweni abakade bezama ukuwenza eHopley, eHarare South, kodwa basebevinjwa ngamapholisa.
Umsekeli wesikhulumeli salelibandla uNkosazana Thabitha Khumalo usole kakhulu ukubotshwa kwabantu laba esithi yimizamo kahulumende weZanu PF yokuhlukuluza amalunga eMDC-T.
"Kuyazikhanyela ukuthi le yindlela yokuhlukuluza abasekeli bethu," kutsho uNkosikazi Khumalo.
Kunjalo nje, iphephandaba leNewsDay lithi kube lokulwisana okubi phakathi kwabasekeli beZanu PF ngoLwesibili emzini weHighfield, eHarare phezu kohlelo lokukhetha abakhokheli balelibandla abatsha kulindawo.
Abazi ngokwenzakalayo bathi abatsha laba bengaba bekumaxuku amabili - eleG40 lelinye elibikwa likhokhelwa ngumsekeli kamongameli uMnu Emmerson Mnangagwa.
Amalunga eG40 agoqela uNkosikazi Grace Mugabe, uMnu Jonathan Moyo, uMnu Phelekezela Mphoko, uMnu. Savior Kasukuwere labanye.
Lelicele libikwa kuyilo elizama ukuvimba uMnagagwa ukuthi engathathi intambo zombusa nxa uMongameli Mugabe engasuka embusweni.
Your browser doesn’t support HTML5
Ingxoxo loNkosazana Thabitha Khumalo