UMongameli Emmerson Mnangagwa uthi uhulumende wakhe usehlolisisa okufunwa nguzulu esabelweni seManicaland lapho okube lezulu lesiphepho uCyclone Idah elibulele abantu abanengi njalo labhidliza izakhiwo ezinjengezindlu, amabholoko, imigwaqo lezikolo.
Cyclone Idai
UMnangagwa wethule lokhu ngoLwesibili ngesikhathi esethekelela indawo ezibhidlizwe lizulu leli.
“Ngibuye lapha ukuthi ngizokhulumisana lezimuli kanye lozulu njalo lokubona izakhiwo engizwe kuthiwa zibhidlike okumangalisayo. Sizehlolisisa ukuthi uhulumende engenzelani ababhekane lalokhu. Sifisa ukuthi sibeleqiniso ukuthi kulomonakalo onganani ukwenzela ukuthi sidinge uncedo olufunakalayo. Amazwe agoqela ele South Africa, Botswana, Namibia lele Angola afisa ukubakwazi ukuthi kulomonakalo onganani ukwenzela ukuthi asisize. Okwamanje sesiqalisile ukuloba phansi konke okufunwa nguzulu lokumele sikulungise.”
Kodwa kulabanye abantu abathi uMnangagwa uphuzile ukwethekelela indawo ezilabantu abanengi ababhubileyo labalezindlu ezibhidlikileyo. Kulabantu abafika phose ikhulu ababulewe lizulu lesiphepho leli. UNkosazana Sally Mlambo, okunhlanganiso yePlatform for Youth Development ohlala eChiyadzwa esabelweni seManicaland, uthi kaboni ukuthi uMnangagwa uzakwenzelani abantu abadinga uncedo.
Ukudla akusatholakali eManicaland
Kulabantu esabelweni seMasvingo abadilikelwe yizindlu kulandela ukuna kwezulu lesikhulula. UNkosikazi Itai Dube, ohlala eBikita, uthi labantwana kwenzinye indawo kabasenelisi ukuya ezikolo ngenxa yokubhidlika kwamabholoho.
Inhlanganiso yeUnited Nations ithi akula elinye izulu eselike lana okwedlula uCyclone Idai etshaye kwazwela kwele Mozambique, eMalawi lakwele Zimbabwe.
Kubikwa ukuthi inhlanganiso le isidinge izigidi ezingamatshumi amabili amadola - $20 million yokuncedisa abakhathazekileyo.
Inhlanganiso yeEuropean Union layo isidinge izigidi phose ezine zamadola – $3,9 million yokunceda amazwe la.
Ilizwe leBhilithane lalo lithi lizanika amazwe la uncedo olulesisindo esifika phose izigidi eziyisikhombisa zama dola – $7,9 million.
Your browser doesn’t support HTML5
Udaba Esilethulelwe NguGibbs Dube