Abatsha eZimbabwe bathi akulasizatho sokuthakazelela usuku lweDay of the African Child ngoba babhekane lenhlupho ezigoqela ukuswelakala kwemisebenzi lokunye. Kodwa uhulumende uthi uyakulungisa konke lokhu.
Usuku lolu ngolokunanza imisebenzi yabatsha kulandela okwenzakala kwele South Africa lapho abasakhulayo abavukela khona uhulumende wabamhlophe woncindezelo ngomnyaka ka1976 besithi kumele kuphele ukukhahlanyezwa kwabansundu. Usuku lolu lunanzwe ngesikhathi abatsha besithi akukho okubambekayo eZimbabwe okwenziwa nguhulumende ukuze behlale kahle elizweni.
UMcDonald Dzirutwe, omunye wabatsha ohlala eHarare, uthi kunzima ukuthakazelela usuku lolu bona behlupheka.
“Esikhubonayo yikuba uhulumende kasinikezi amathuba afana labadala nxa sikhangela kumnotho welizweni lethu leZimbabwe.Ngesikhathi sithakazelela ilanga leli yikho esikucelayo njalo esifisa uhulumende asenzele khona.”
Osakhulayo uNobuhle Sibindi laye ukhala ngokubhekane labatsha eZimbabwe.
“Kunzima kakhulu ukuthola imsebenzi nxa ungosakhulayo. Uthola ukuba imsebenzi imenengi ifuna abantu
asebehlale isikhathi eside besebenza. Lokhu kwenza ukuba sicine sesitshiya imsebenzi esiyithandayo sesisenza loba yini ukuze siphile. Akula msebenzi yabatsha.”
USharon Manala laye uthi ukuswelakala kwemisebenzi kwenza abanye babo becine bethatha izidakamizwa.
“Abanye bethu nxa beswela imsebenzi bacina sebephatheka ekwenzeni izinto ezinzima ezifana lokuthatha izidakwamizwa, ukuthengisa imzimba lokunye. Ngabe uhulumende uyakukhangela lokhu ukuze sisizakale.”
Kodwa uMnu. Tybalt Ndlovu oyisiphathamandla sikakhulumende kugatsha lwabatsha uthi uhulumede weZimbabwe wenza okunengi okusekela abasakhulayo.
“Uhulumende wethu wenza konke ukuba abatsha betholakale kunhlangothi zonke zempilo kuleli. Okukhona yikuba abanengi bayabe bengazazi inhlelo lezi kodwa zikhona zikhokhelwa ngabe ZImbabwe Youth Council, sibakhuthaza ukuba baphatheke.”
UElisha Gumbo okubandla leZanu PF laye uthi uhulumende kaMongameli Emmerson Mnangagwa ukhathalela abatsha.
“Thina siyakwazi okwenziwa nguhulumende wethu njalo siyakwazi ukuba uhulumende wenza okunengi ekusekeleni abatsha. Ngelanga le day of the African child sikhuthaza abatsha ukuba basekele uhulumende wethu lemizamo yakhe.”Usuku lweDay of the African
lonyaka luqhutshwe phansi kwesihloko esithi ‘Education for the African child, education for all’.