Abadinga ukufundela ukuba ngabongi bebebuzisiswa ngoLwesine ngabogatsha lwezempilakahle esibhedlela seUnited Bulawayo Hospitals koBulawayo kodwa abanye abenelisanga ukufinyelela esigabeni sokubuzisiswa ngoba bebengela ncwadi ezeneleyo ebezifuneka.
Abangaphumelelanga bacelwe ukuba babhalele ugatsha lwezempilakahle besazisa izizatho ezibavimbe ukufinyelela isigaba lesi sokubuzisiswa.
Omunye wabangaphumelelanga ukungena kulesi sigaba nguNkosazana Percy Maseko othi bamukelwe kuhle kodwa inkinga ibekuye ngoba ubengela ncwadi yempumela yezifundo zeOrdinary Level.
“Mina ngikhethe ukuthi ngihambe ngelanga lokuqala ekufikeni kwethu basamukele kuhle kakhulu bakhuluma lathi kuhle basebecela ukubona ama certificate. Mina inkinga ebekhona yikuthi amacertificate bengilawo kodwa eyeMaths bengingelayo ngoba ngiyibhale ngoJune last year ngakho icertificate besingakaphumi basebengazisa ukuthi iresult slip ayifunakali lakho ku advert kwakubhaliwe kuthi no result slip kodwa mina ngihambe ngilethemba ukuthi bazavuma ngoba icertificate asikaphumi. Basebesibhalisa izingcwadi ukuthi sibhale ukuthi asisa interview ngoba besilama result slip.”
Osakhulayo njalo ongumqondisi wenhlanganiso yabaphila ngokuthengisa eyeBulawayo Vendors Association uMnu. Mike Ndiweni, uthi bazama ngamandla wonke ukuthi bancede labo abasebuzimeni lobu.
Kodwa kulabanye abathi benze kahle ngesikhathi bebuzisiswa yiziphathamandla zikahulumende.
Omunye wabafundi uNkosiphile Dliwayo ofinyelele isigaba sokubuzisiswa uthi konke kuhambe kahle.
“Kuma interviews bekumnandi kakhulu sihlangane labo bakhuluma lathi kuhle. Into akade bezifuna basitshelile njalo okade kushota basitshelile. Basitshela futhi okumele sikulungisise ngaphi langaphi, kodwa hayi ama interviews ahambe kahle bekungekho nzima.”
UMnu. Prince Ncube uthi konke kuhambe kahle laloba kungayisikho akade ekukhangelele ubethi kuzaba nzima kakhulu.
Abazaphumelela bazangena ezifundweni lezi lonyaka.
Your browser doesn’t support HTML5
Kulabanye Abakhala Ngokuswela Indawo Yokufundela Ukuba Ngabongi