* Ibandla leANC lilakho ukwehlulela ukuthola amavoti angenza libumbe uhulumende lilodwa
* Abavotayo bakhala ngokuswelakala kwemisebenzi, ubugebengu lokusilela komlilo kagesi
* Kukhanya kulabantu abanengi abavotayo lonyaka abedlula abavota ngomnyaka ka2019
By Wendell Roelf and Kopano Gumbi
Bayavota abantu kwele South Africa namuhla kukhetho okukhangelelwe ukuba ibandla leAfrican National Congress (ANC) lilakho ukwehluleka ukuthola inani elikhulu lamavoti elingenza lehluleke ukubumba lodwa uhulumende.
Abezindaba abeReuters babika ukuba bekugcwele abantu endaweni zokuvota eJohannesburg, Cape Town, Durban lezinye indawo loba bekulamakhaza.
Inengi labantu abagoqela uNkosazana Bongile Mkunqa, ovotele eLanga eCape Town, bakhala ngokuswelakala kwemisebenzi. Uthi ibandla leANC kalenzanga kuhle kusukela ngesikhathi ilizwe lithola uzibuse ngakho-ke ufisa ukuba kubelonguquko kwele South Africa.
Abanye bakhala njalo ngokusilela komlilo kagesi, ubugebengu obumangalisayo, inkohlakalo lokunye okuzakwenza bevotele amabandla aphikisayo, abalisa eleDemocratic Alliance, Umkhonto Wesizwe, Economic Freedom Fighters lamanye.
Kodwa uMnu. Charles Louw, oleminyaka yokuzalwa engamatshumi ayisitshupha lambili – 62 ohlala elokitshini leAlexandria, uthi uvotele ibandla leANC ngoba kalathemba lokwethulwa ngamabandla aphikisayo.
ULouw uthi ibandla elibusayo selikwazi okokwenza njalo lilabantu abatshiyeneyo.
Ibandla leli elalikhokhelwa ngumuyi uNelson Mandela lanqoba kukhetho olukhulu lwakuqala ngomnyaka ka1994 njalo laqhubekela phambili libusa kuze kube namhlanje loba amavoti alo ehla ngokuya kwesikhathi.
Lingehluleka ukuthola amavoti afika okuyisilinganiso sengxenye ekhulwini – 50%, ibandla leli kumele likhulumisane lamanye amabandla aphikisayo ukuze kubunjwe uhulumende.
Lokhu akukaze kwenzakale kubandla leANC njalo akwaziwa okuzakwenzekala elizweni leli kusiya phambili.
Kukhethwa amalunga amadale ezabelo njalo lawedale lephalamende elizakhetha umongameli omutsha.
Uma ibandla leANC lingavotelwa ngabantu abanengi, uMnu. Cyril Ramaphosa ulakho ukuqhubekela phambili ebusa kwele South Africa.
Kulabantu abafika phose izigidi ezingamatshumi amathathu – 27 million ababhalisele ukuvota kukhetho endaweni ezedlula inkulungwane ezingamatshumi amabili – 23,000.
AbeReuters babika ukuba kulabantu abalutshwane kakhulu abaxotshwe endaweni zokuvota eJohannesburg ngoba bebengabhalisanga ukuvota kukhetho lolu. Kulabanye abamelele amaphepha okuvota elokitshini leAlexandria acine efikiswa kuleyondawo abanye sebekhathele ukuwamelela.
UMnu. John Steenhuisen okhokhela ibandla leDemocratic Alliance, elingelinye lamabandla amakhulu kwele South Africa, ucele abantu ukuba bevote ngobunengi babo.
Ibandla leli lathola amavoti amanengi ngomnyaka ka2019.
EleEconomic Freedom Fighters elikhokhelwa nguMnu. Julius Malema lalo likhangelelwe ukuba lizathola amavoti athe xaxa. Ibandla leli lifuna ukuba kuhluthunwe umhlabathi osezandleni zabamhlophe, kuthathwe lamabhanga lamanye amankampani ukuze uzulu athole inzuzo kumnotho welizwe.
Akwaziwa ukuba ibandla leUmkhonto Wesizwe lizatholani kukhetho lolu kulandela ukuvinjwa kowayengumongameli uMnu. Jacob Zuma ukuthi angene kukhetho lolu. Lithi uRamaphosa labanye bakhe kabasaqhubi okwakufiswa nguzulu owalwela inkululeko.
Kukhangelelwe ukuba impumela yokhetho lolu izakwethulelwa uzulu kungavalwa indawo zokuvotela. Kodwa kuzathatha insuku phose ezine ukuze yethulwe ngokugcweleyo impumela yokhetho lolu.