UDokotela Muriel Selma Fallala, obelodumo olukhulu koBulawayo njalo esazakala ngokusebenzela uzulu, unikwe inhlonipho yeqhawe lenkululeko yesizwe, Liberation War Hero nguhulumende wase Zimbabwe.
Lokhu kubikwe lilunga lePolitiburo kubandla leZanu PF, uRetired Colonel Tshinga Dube, enkonzweni yokuvalelisana loDokotela Fallala eyenzwele eAmphitheatre koBulawayo.
Bavalelisa uDokotela Falala obhubhe engozini yemota koBulawayo. (Photo: Ezra Sibanda)
UDokotela Fallala ubhubhe engozini yomgwaqo lapho imota abeyitshayela imphunyuke yagenquka yasisiyatshayeka ekhunjini lomgwaqo.
Izakhamizi zako Bulawayo, ezigoqela iziphathamandla zikahulumende, abezempilakahle lakwezinye inhlangothi zempilo babuye ngobunengi babo bathi gwaqa eAmphitheatre bezovalelisa uDokotela Fallala.
Inengi labakhulume emngcwabeni kaDokotela Fallala baveze ukudabuka kwenhliziyo besithi lokhu yikulahlekelu kwalumhlubulo welizwe kanye lelizwe lonke ngumuntu obesebenzela uzulu.
"Silahlekelwe ngudokotela wethu, udokotela osebenze kakhulu la koBulawayo osebenzela isizwe. Sithanda ukukhala kanye lemuli, imuli yako Fallala sikhala ndawonye, imuli kaBulawayo, imuli yeMatebeleland. Kungilimazile kakhulu, ngiyabonga."
Bavalelisa uDokotela Falala obhubhe engozini yemota koBulawayo. (Photo: Ezra Sibanda)
UDokotela Fallala ubelilunga lenhlanganiso zempilakahle ezinengi kwele Zimbabwe lakuzwekazi leAfrica. Umphathi wesibhedlela seMpilo uDokotela Solwayo Ngwenya usebenze kakhulu lomuyi.
"Silahlekelwe kakhulu nguDokotela Fallala ubengumuntu oncedisa kakhulu abantu lapha koBulawayo, ebelethisa omama. Ngudokotela oqakatheke kakhulu, sizasala sidubeka kakhulu lapha koBulawayo. Sibuhlungu kakhulu ngokuthi namuhla simbekile phansi, ubhubhe engozini yemota. Usizwise ubuhlungu kakhulu."
UNkosikazi Emely Sibanda, omunye owasizwa nguDokotela Fallala, uveza ubuhlungu abuzwayo ngalimfa.
"UDokotela Fallala wanginceda kakhulu, ngangijayele ukuhamba khonaphana eGalen House lomntanami she is Asthmatic ngelanga lonalelo she had a very severe one and I almost lost umntwana yena lowu. Ngathi ngifika laye wahle wambona vele phakathi khonaphana waphuma wamelela phandle, from there wahle wamthatha sibili wabalaye for one full hour lokhe ehlezi eceleni vele emonitor ebona ngoba ioxygen yakhe yayisiphansi."
UDokotela Fallala ubesaziwa kakhulu ngobungcwethi bakhe bokubelethisa kuhle omama njalo ubelabangane abagoqela uNkosikazi Lucia Dube.
"Ubengumuntu oqakathekileyo kithi ikakhulu thina abantu besifazane. Wabelethisa abantu abanengi, abanye namhlanje sebeze labo bengodokotela abadlula ezandleni zakhe. IBulawayo ilahlekelwe bakithi."
Bavalelisa uDokotela Falala obhubhe engozini yemota koBulawayo. (Photo: Ezra Sibanda)
Umsakazi olodumo uNonceba Mnkandla wasebenza kunhlelo zempilakahle edolobheni lako Bulawayo lomuyi.
"Umhlaba kawunoni umhlaba kawusuthi. Silahlekelwe kakhulu koBulawayo ngokubhubha kukadokotela Muriel Falala, udokotela obesiza abantu abanengi kakhulu, omama abanengi kakhulu ubasizile ubelethise abantu abanengi. UMuriel ubesebenza labantu, abantu ubebazi, ubewuthanda umsebenzi wakhe."
UDokotela Fallala wahamba empini esemncane ekubandla leZapu eZambia, wasuka wathunyelwa eRussia ukuyafundela ukuba ngudokotela.
Ekutholeni uzibuse usebenze esibhedlela seMpilo okwesikhathi eside wacina evula esakhe isibhedlela njalo ubhubhe eseleminyaka engamatshumi ayisithupha lesitshiyagalolunye 69, esengumqondisi weGallen House ekhokhela odokotela abanengi.
Usebenze njalo labanye odokotela abagoqela uDokotela Sururu abaqalisa uhlelo lweFamily Medicine ko Bulawayo njalo befundisa abanye odokotela abafuna ukuba zingcwethi kwezokwelapha ekholitshini elikhulu eleNational University of Science and Technology.
Your browser doesn’t support HTML5
Bavalelisa Udokotela Obelodumo