Amabandla aphikisayo kwele Zimbabwe atshengisela emigwaqweni ngoLwesihlanu kulandela ukuvota kwama pholosa ngoLwesine obekubikwe yikhomishini yeZimbabwe Electoral Commission ukuthi akukho emthethweni.
UMnu. Utloile Silaigwana, obambe isikhundla somqondisi weZimbabwe Electoral Commission, uqale wala ukuthi kulokhetho lwama postal votes waphinda watshintsha ingqondo esithi lwenziwe okusemthethweni.
Abatshengisela koBulawayo ...
Amapholisa akade evota kulelokhetho abetshelwa ukuthi avotele uMongameli Emmerson Mnangagwa njalo atshelwe ukuthi angavali incwadi ezifakwe ama postal vote.
Odinga ukumela iMakokoba edale lephalamende, uMnu. Sidingani Dube, ngomunye obetshengisela eRoss Camp ngoLwesihlanu.
“Siyajabula ukubona intathelizindaba ziloba ngobuqili lobu obusobala. Lokhu okwenzakala lapha kukhombisa ukuba ibandla elibusayo liqhuba ukhetho olungekho free and fair njalo yikho esakusola kusabusa uMnu. Robert Mugabe. Sokusenzakala njalo".
Isakhamuzi sakoBulawayo, uMnu. Mark Sibanda. yena uthe ubuqili bukaMnangawa busobala.
"Lamhlanje silapha eRoss Camp sitshengisela sicela ukuba umongameli aqhube ukhetho oluhle, hatshi ukuvotisa amapholisa ngundlu ngemva kokuhlela ukhetho".
Indawo lapho obekuvotelwa khona ...
UNkosikazi Nokuthaba Hlongwane, womanyano weMDC Alliance, laye usole kakhulu okwenziwa nguhulumende kaMnangagwa.
"Okwenziwa nguMongameli Mnangagwa asikufuni njalo asihambelani lakho kungani esebenzisa ibutho lamapholisa ukuvota ngapha koBulawayo vele asimfuni laye uyazazela".
Amavoti amapholisa abikwa ezayagcinwa ngabeZimbabwe Electoral Commission eHarare engavulwanga abesethunyelwa lapho ababhalisela ukuvota sekusele amalanga amabili ukuba ukhetho lwenziwe.
Kusenjalo, ibandla leMthwakazi Republic Party seliqale ukuhamba likhankasa edolobheni lakoBulawayo lithanyela imigwaqo.
Ozamela iMRP eBulawayo Central edale lephalamende uNkosazana Sehliselo Ndebele laye usemkhankaseni lo.
Abanye abantu ababone isiga lesi ...
"Ngiqhube uhlelo lokuhlamba idolobho bekuyindlela yokukhombisa uBulawayo ukuba avotele ibandla lami njalo ibeyimpumela enhle iclean up yethu".
UMnu. Patson Ncube, odinga ukumela uWard 2 KoBulawayo, ujabulele uhlelo lokukhankasa ngokuthula.
"Lamhlanje siqhube uhlelo lokuhamba sikhuthaza uBulawayo ukuba avotele ibandla lethu njalo ngiyajabula ngoba idolobho lethu lisele lihlanzekile njalo kulokuthula".
Sekusele amalanga alitshumi lasikhombisa ukuba iZimbabwe iqhube ukhetho lokudinga umongameli, amalunga edale lephalamende kunye lamakhansili kodwa kulokungazwani kwamabandla ezombusazwe lekhomishini yeZEC ngendlela elungiselela lolukhetho lobanje ukukhankasa sekufike esibangeni esiphezulu.