Amalunga amathathu ebandla leMDC abethunjwe ngabantu abacatshangelwa ukuthi badlelana lohulumende weZimbabwe athi atshaywe kwazwela njalo abanjwa ngamandla ukuthi adle amaphumelo abantu.
Abantu laba abathunjwe ngoLwesithathu eHarare - uNkosazana Joanna Mamombe omele iHarare West edale lephalamende, uCecilia Chimbiri loNetsai Marova – batholakale phandle kwezitolo eMuchapondwa esiqintini seMusana eBindura South.
UMnu. Luke Tamborinyoka, umsekeli wesikhulumeli sebandla leMDC elikhokhela nguMnu. Nelson Chamisa, uthi abathathu laba badatshukelwe kulandela ukutshaywa kwabo yilabo ababathumbayo.
Uthi bathi babanjwa ngamandla ukuthi badle ingcekeza yomuntu ngesikhathi betshaywa egangeni okulamagodi endaweni engaziwayo.
UTamborinyoka uthi abathathu laba sebehanjiswe esibhedlela eHarare lapho abelatshwa khona.
Kasenelisanga ukukhuluma ngodaba lolu lamapholisa ngoba isikhulumeli sabo, uAssistant Commissioner Paul Nyathi, ubengaphenduli umakhalekhukhwini wakhe.
Amagqwetha asebenza udaba lolu athi kukhanya belimele abathathu laba njalo bakhathazekile engqondweni ngenxa yalokhu abakwenziwe ngabacatshangelwa ukuthi ngamapholisa ensitha.
Umsekeli womphathintambo kahulumende obona ngokwethulwe kwemibiko, uMnu. Energy Mutodi, wethule umbiko ebulenjini beTwitter esithi ngamanga aluhlaza tshoko ukuthi uMamombe labanye bakhe kade bethunjiwe. Kavezanga ukuthi ukutsho ngani lokhu.
Igqwetha labathathu laba elisebenzisana labenhlanganiso ye Zimbabwe Lawyers for Human Rights umnumzana Jeremiah Bhamu uthi kuyisimanga ukuba amapholisa wona abesithi akazi lutho ngabo sekuyibo asebegijima ukuzabalondoloza esibhedlela.
Ukuze batholakale abathathu laba kube lokusebenzelana kwenhlanganiso ezilwela ilungelo loluthu ezithi eyeZimbabwe Lawyers for Human Rights leye Zimbabwe Doctors for Human Rights.
Lintathelizindaba kayisanelisanga ukungena phakathi esobhedlela ukuyakhulumisana labathathu laba ngemva kokuvinjwa ngunobhala jikelele weMDC, uMnu. Charlton Hwende, lanxa evumele ezinye ukuba zingene zithathe izithombe lokukhulumisana labathathu laba ukuzwa udaba lwabo kuloludaba.
Inkokheli yeMDC okubalisa, uMnu. Nelson Chamisa, uMnu. Tendai Biti labanye baze sekulaphayana, abazali babathathu laba sebekhonona besithi kabasuthiswa yindlela loludaba oluphathwa ngalo ngabe MDC lohulumende.
Unobhala wogatsha lokwethulwa kwemibiko, uMnu. Nick Mangwana, wethule umbiko esithi sebelutholile udaba lwabathathu laba ababikwa bethunjwe ngemva kokutshengisela besephula iziqondiso zelockdown ngakho-ke uhulumende usaluhlolisisa loludaba nxa kungatholakala oyabe eyephule umthetho uzabotshwa.
Your browser doesn’t support HTML5
Udaba Esilethulwe NguMavis Gama