Abatsha abaphila lobugoga bathi bathwele nzima ezikolo lemakolitshini eZimbabwe ngenxa yokusilela kwengwalo zebraille, imitshina yalabo abazwela khatshana, ukuswelakala kwababalisi lokunye.
Inhlanganiso ekhangelane lenswelo zabantwana emhlabeni wonke jikelele eyeUnited Nations International Children’s Emergency Fund kumbe iUNICEF ithi inhlupho lezi zitholakala emazweni amanengi athuthukayo. Abasakhulayo eZimbabwe bayakusekela lokhu besithi babhekane lobunzima ezikolo zemfundo yaphansi kanye lemakolitshini wonke elizweni.
Omunye wababhekane lenhlupho lezi nguSelina Moyo ofunda ekolitshini yeUniversity of Zimbabwe.
“Ukufunda kwakhona akulula ngoba akula mabhuku awe braille amanengi. Lawo akhona uyathola ukuba alotshwa kudala ngesikhathi kulabantu ababelendaba lathi abafana lo Prof Makumbe. Kulezinsuku akutholakali. Lokhu kwenza sifunde nzima,” kutsho uMoyo.
Uthwele nzima loDennis Shoko ofunda eBudiriro Group of Schools, ophila lobugoga benyawo lezinye izitho zomzimba.
“Isikolo kasilandaba lokuba ngibuya njani, kwesinye isikhathi ngiyaphuza ngithole abanye sebefunda. Ukuthi badinage ukuba kuyini okwenza ngiphuze ngesimo sami kabalandaba lakho. Kwesinye isikhathi bafunda ku upstairs okwenza mina ngisale ngoba akula indlela abangangikhweza ngayo,’’ kutsho uShoko.
UKudzai Hove ofundela ukuba ligqwetha uthi uhulumende uzama ngamandla wonke ukuba befunde ngcono lobanje ehlangana lenhlupho ezinengi.
Ngamalanga okuqala ngangithwala nzima ukuba ngamukeleke kodwa kulezinsuku uyathola ukuba akusafani. Uhulumende ulemthetho yakhe ayibekayo eyenza ukuba lathi sibonakale njengabantu,’’ kugcizelele uHove.
Ofundisa izifundo zokuthuthukisa abaphila begogekile eUniversity of Zimbabwe Disability Centre, uMnu. Sipho Ncube, uthi kunengi okumele kwenziwe ukuba abantwana abagogekileyo baqakathekiswe.
"Lapha siyazama ukuba wonke umntwana loba engaboni, engahambi kumbe engakhulumi azuze uncedo. Kodwa kufunakala okokusebenzisa okunengi ukuze abantwana laba baveze izifiso zabo ngoba bengabantwana njengomntwana wonke,’’ kutsho uNcube.
Obona ngendaba zabagogekileyo kugatsha luka hulumende olwemfundo uMnu. Norman Tshuma, uyakusekela lokhu.
"Uhulumende uyazazi indubo ababhekane lazo. Sizama minyaka yonke ukuba batholiswe konke abakufunayo lobanje kukhona okusivimbayo okufana lemali,’' kutsho uTshuma.
Ugatsha lukahulumende olwezemfundo kuthi kulabantwana abafika amatshumi amane ekhulwini - 40% abangenelisi ukuphutsha izifundo ngenxa yokuphazanyiswa yibugoga kuthi njalo abafika amatshumi amabili lanhlanu ekhulwini - 25% abagogekileyo kabakho ezikolo.